Украинадаги турар жой биносига ўт очган россиялик танкчига ҳукм чиқарилди

Украина суди россиялик танкчи, Черниҳив атрофидаги турар жой биносини ўққа тутишда айбланган Михаил Куликовни 10 йилга озодликдан маҳрум этди. Куликов Украинада босқин бошланганидан буён қамалган иккинчи россиялик ҳарбий бўлди.

Фото: PETER KOVALEV/TASS

Черниҳивнинг Деснянский район суди Куликовни уруш урф-одатлари ва қонунларини бузишда айбланган.

Куликов устидан суд жараёни Черниҳивда 24 июн куни бошланганди. Биринчи суд мажлисида у амалда айбига иқрор бўлганди. 4 август куни прокурор суддан россияликни 10,5 йиллик колонияга жўнатишни сўраганди.

Айблов томони версиясига кўра, 26 феврал куни 31 ёшли Куликов ўз командири буйруғига кўра Т-72Б танкидан Черниҳив атрофидаги кўп қаватли турар жойга ўқ узган. Зарба натижасида квартиралар вайрон бўлган, аммо қурбонлар қайд этилмаган. Ўша куни украин ҳарбийлари Куликовни асир олишган.

Куликовнинг тасдиқлашича, Шчеткин фамилияли командир унга кўп қаватли уйдаги квартиралардан бирида танкка қарши гранатомёт (РПГ) борлигини айтган, шундан кейин у танк минорасини бурган ва ўт очган. Куликов судда турар жойга қарата ўқ узаётганини англаб ҳаракат қилганини тасдиқлаган.

«Барчаси тез бўлиб кетди, автоматизм билан. Қўрқув ичида. Ўзим учун ҳам, экипаж учун ҳам қўрққандим. Мана шундай қилиб ўқ уздим», дея танкчининг сўзларини келтирган «Ґрати» нашри.

Шунингдек, Куликов қилган ишидан пушаймонлигини айтиб, жабрланган квартиралар эгалари ҳамда Украина халқидан узр сўраган.

«Украина аҳолисидан бу ерга бостириб келганим учун кечирим сўрайман, бу биз томонимиздан нотўғри иш эди. Ўт очганим учун ҳам узр сўрайман - мен бу ишни қилганимдан жуда ҳам афсусдаман. Мен ундан кейин бундай буйруқларни бажармаган бўлардим, чунки улар жиноят ҳисобланади», деган у.

Россия мудофаа вазирлиги кўп марта зарбалар фақат ҳарбий объектлар ва инфратузилмаларга йўлланаётганини маълум қилган. Суд бошланган маҳалга келиб асирлар алмашинуви доирасида Россияга қайтган майор Шчеткин блогер Юрий Золкинга берган интервьюсида унинг танки одамлар ва аҳоли яшаш жойларига қарата ўт очганини рад этганди.

Куликов - Олтой ўлкасининг Алейск шаҳридан. У шартнома асосида Россия қуролли кучларининг 41-умумқўшин армияси таркибида йўналтирувчи оператор сифатида хизмат қилган.

Май ойи охирида Украинада 21 ёшли россиялик ҳарбий Вадим Шишимарин суд қилинганди. Суми областида тинч аҳоли вакилини ўлдирган Шишимаринга суд томонидан умрбод қамоқ жазоси тайинланганди. 29 июл куни апелляция суди бу жазони 15 йилга озодликдан маҳрум этиш жазосига алмаштирди.