Кеча, 18 август куни Сирдарё вилояти Оқолтин туманида "Исузу" русумли автобусга ўрнатилган газ баллони портлаши оқибатида 6 нафар инсон вафот этиб, 15 нафари турли даражадаги тан жароҳатлари олган.
Ҳодиса жойи бош прокурор биринчи ўринбосари Баҳриддин Валиев, Фавқулодда вазиятлар вазири Абдулла Қўлдошев, Сирдарё вилояти прокурори Санжар Мавлонов, мутасадди идоралар раҳбарлари ҳамда вилоят ва туман ИИБ тезкор-тергов гуруҳи ходимлари иштирокида кўздан кечирилиб, тегишли ҳужжатлар расмийлаштирилган.
Мазкур ҳолат юзасидан Сирдарё вилояти прокуратураси томонидан Жиноят кодекси 262-моддаси (Транспортни таъмирлаш ёки уни фойдаланишга чиқариш қоидаларини бузиш) 3-қисми "а" банди билан жиноят иши қўзғатилди.
Тергов ҳаракатлари олиб борилмоқда.
Маълумот учун, 18 август куни тахминан соат 14:30 ларда Сирдарё вилояти Оқолтин тумани ҳудудида жойлашган автомобилларга газ тўлдириш шохобчасида портлаш содир бўлганди.
Хоразм вилояти Боғот туманидаги автомактабга тегишли бўлган “Исузу” русумли автобус метан газ тўлдириб чиққан вақтда унга ўрнатилган газ балонлари бирида портлаш содир бўлган.
Ҳодиса оқибатида 6 киши воқеа жойида вафот этган ва 15 киши тан жароҳати олган.
