Буюк Британия биринчи марта Россиядан энергия ташувчилар импорт қилмади

Июнь ойида Буюк Британия камида чорак аср ичида биринчи марта Россиядан ҳеч қандай энергия ташувчини импорт қилмади. 24 август, чоршанба куни Лондондаги ONS статистика бошқармаси маълум қилишича, Украинага қуролли бостириб кириши сабабли Россияга қарши санкциялар тахминан олти ой олдин жорий қилинганидан бери РФдан импорт доимий равишда камайди. 

Июнь ойида, 25 йил олдин ҳисоб-китоблар бошланганидан бери биринчи марта Буюк Британия Россиядан бензин, дизель ёнилғиси, газ, кўмир, кокс каби қайта ишланган нефть маҳсулотларини импорт қилмади. Айни пайтда, фақат ўтган йили Россия бундай маҳсулотларни Британияга энг кўп етказиб берган эди. 

Буюк Британияда бошқа рус товарларининг импорти ҳам амалда тўхтади. РФга қарши санкциялар туфайли Россиянинг Британияга импорти ҳажми 97 фоизга қисқарган ва ҳозирда атиги 33 миллион фунт стерлингни ташкил этмоқда, деб таъкидлади ONS. 

Лондон ҳукумати санкциялар бир қисми сифатида Россия маҳсулотларининг айримларини импорт қилишни бутунлай тақиқлаб қўйди, бошқаларига эса катта божлар киритди. Йил охирига қадар Россия нефти ва нефть маҳсулотларини импорт қилишни бутунлай тўхтатиш режалаштирилган. Кўпгина корхоналар ихтиёрий равишда Россия билан бизнес юритишни тўхтатди. 

Россия ўрнига Британия компаниялари бошқа мамлакатларда харид қилишни афзал кўрмоқда. ONS маълумотларига кўра, Саудия Арабистони, Нидерландия, Бельгия ва Кувайтдан нефть маҳсулотлари импорти ошган. Газ қазиб олиш ҳам ортиб бормоқда: йилнинг биринчи ярмида қиролликда газ қазиб олиш йилига 26 фоизга ошди.