Россияда муниципал депутатларнинг мамлакат президенти номақбул хатти-ҳаракатлари тўғрисида эълон қилган янги мурожаати пайдо бўлди. Мурожаатни петербурглик депутат Ксения Торстрем эълон қилди.
Москва, Санкт-Петербург ва Колпинонинг 18 та округи муниципал депутатлари Россия президенти Владимир Путиннинг истеъфосини талаб қилиб, оммавий баёнот билан чиқишди. 12 сентябр, душанба куни мурожаатни Санкт-Петербургнинг «Семеновский» муниципал округи депутати Ксения Торстрем Twitter’да эълон қилди. У бошқа муниципал депутатларни баёнотга қўшилишга чақирди.
«Биз, Россия муниципал депутатлари, президент Владимир Путиннинг хатти-ҳаракатлари Россия ва унинг фуқаролари келажагига зарар етказади, деб ҳисоблаймиз. Биз Владимир Путиннинг Россия Федерацияси президенти лавозимидан истеъфога чиқишини талаб қиламиз!» – дейилади 20 га яқин депутат имзолаган мурожаат матнида. Торстремнинг таъкидлашича, «мурожаат матни ихчам» ва ҳеч кимни «обрўсизлантирмайди».
Муниципал депутатларнинг шунга ўхшаш баёнотлари ўтган ҳафтада пайдо бўла бошлади. 7 сентябр куни Санкт-Петербург «Смолнинское» муниципалитети депутатлар кенгаши Путинни давлатга хиёнат қилгани учун лавозимидан четлатиш чақириғи билан Давлат думасига мурожаат юборишга қарор қилди. Улар президентнинг қарорлари оқибатларини бунинг аломатлари деб аташган: Россия армияси бўлинмаларининг йўқ қилиниши, Россиянинг ёш ва меҳнатга лаёқатли фуқароларининг ўлими ва жароҳати, Россия иқтисодиётига зарар етказиш ва НАТОнинг кенгайиши, шунингдек, Украина армиясининг замонавий Ғарб қурол-аслаҳалари билан жиҳозланиши, бу - унинг «демилитаризация» мақсадига зиддир.
Ташаббусни қўллаб-қувватлаган Санкт-Петербург муниципалитет депутатларидан бири Никита Юферевнинг DW нашрига айтишича, 8 сентябр куни унга ва «Смолнинское» муниципалитетининг бошқа депутатларига полициядан қўнғироқ бўлган. Уларга нисбатан Россия армиясини «обрўсизлантириш» бўйича протоколлар тузилди.
Бундан ташқари, 8 сентябр куни Москванинг «Ломоносовский» муниципал округи депутатлари кенгаши Путиндан истеъфога чиқишни сўради. Москва мундеплари президентга эълон қилинган мурожаатида ҳокимият ўзгариши мамлакатнинг муваффақиятли ривожланиши учун муҳим эканлигини ёзади, Путин учун эса иккинчи муддатдан кейин «ҳамма нарса қандайдир тарзда нотўғри кетди: ЯИМ икки баравар ошмади, минимал иш ҳақи эълон қилинган рақамларга кўтарилмади, ақлли ва меҳнатга лаёқатли одамлар Россияни оммавий тарк этяпти, ваъда қилинган барқарорлик кўринмаяпти».
