“Кейинги мақсадим – гул сотиб турмуш ўртоғим ва қизимни ҳам Умрага юбориш” – гулчи аёл

Kun.uz сайтида Фарғона шаҳрида жойлашган супермаркет ёнида гул сотиб ёлғиз қизини олийгоҳда ўқитган ва ҳалол меҳнати ортидан пул жамғариб Умрага кетган аёл ҳақида мақола ва видеолавҳа эълон қилинган эди.

Умра сафаридан қайтган содда ва самимий гулчи аёл Дилфузахон опа Қўзиева ўз таассуротларини Kun.uz мухбири билан ўртоқлашди.

“Оёқ-қўлим, кўзим билан бориб кўрганимга шукрлар дейман. Меҳнат қилсангиз унинг ортидан албатта роҳатини кўрасиз. Мен шунга иқрор бўлдим. Натижасини, камолини ҳис қиляпман.

Умра сафарига кетиш олдидан “Тошкент питакдан” пойтахтга қизим ва опам кузатиб қўйди. 15 август куни тонг саҳар 7:00 атрофида самолётга ўтирдик. Сумкалар билан кетяпман-у, лекин ҳақиқатан буюк сафарга кетаётганимга ҳалиям ишонмайман. Самолётга биринчи марта чиққаним учун ҳаяжон босди.

Аввал Дубайга қўндик. Ундан кейин Саудия Арабистонининг Жидда шаҳрига тушдик. Жидда шаҳридан автобусга чиқиб йўлга тушдик. Ўзим билан бирга патир нон ва олма олган эдим. Ҳамроҳларимга уни улашдим. Тонг саҳар 4:00 га яқин Мадинага етиб келдик. Осмонўпар биноларни кўриб бошим айланди. Юзимга Мадинанинг иссиғи урилди.

Гўзал масжидларда юрт, маҳалла-кўй тинчлиги учун дуода бўлдик. Биз борган пайтда президентимиз ҳам ўша ёқда экан. Мени хурсанд қилган нарса: ҳамма жойда эҳсон қилиниб, сув, хурмо ва ширинликлар тарқатилгани бўлди. Ўз юртимга бориб бир йилда бир марта бўлса ҳам кучим етганича жума намозларидан чиққанлар учун эҳсон қилишликни астойдил ният қилдим.

Ибодатни қилиб бўлиб ошхонада тановул қилиб ўтирганимизда қашқадарёлик 70 ёшли эркак билан гаплашиб қолдим. Унинг юзидан нур ёғиларди. Нотаниш эркак Умра сафарига велосипедда келган экан. Суҳбатдошим 500 долларга виза қилиш учунгина пул сарфлаган бўлиб, йўл-йўлакай саховатли инсонлар кўмаги билан шу ергача етиб келган экан. У инсон менга нафл намозларни кўп ўқишни маслаҳат қилди.

Тўғрисини айтаман, юртимга келгим келмасди. Дилим яйраб юрди у масканда. Оилам билан ҳар куни интернет орқали гаплашиб турдик. Турмуш ўртоғим кетиш олдидан янги телефон совға қилган эди. Телеграмдан фойдаланишни билмасдим. Аста-секин ўрганиб, уйдагилар билан у орқали мулоқот қила бошладим”, – дейди гулчи аёл.

***

“Гўзал юртни кўриб ўзимга тарбия олдимки, одамлар билан уришишдан, уларнинг дилини оғритишдан паноҳда юришликни ўргандим. Умра сафаридан ҳуддики янги туғилган чақалоқдек бўлиб қайтдим. Сафардан қайтганимдан кейин ҳамма бирдек “Хожи она” деб кўкларга кўтаришяпти. Менга бундай илтифотлар керак эмас. Ўша-ўша оддий гул сотувчи аёлман.

Умрага бориш учун мисқоллаб пул жамғардим. Ният қилиб пул тўпласангиз, албатта йўлингизни топасиз. Қизим менга жуда кўплаб китоблар совға қилди. Туғилган кунимда кийим-кечак эмас айнан китоб кириб келарди уйимга.

Умрадан келганимдан кейин жуда кўплаб инсонлар йўқлаб келяпти. Бундан бошим осмонга етди. Эндиликда топган маблағимни эҳтиёжманд инсонларга бермоқчиман. Давлат ишида ҳам ишлаб, бўш вақтимда гулларимни парваришлаб яна сотишни йўлга қўяман. Яна пул жамғараб турмуш ўртоғим ва қизимни Умрага жўнатмоқчиман.

Президентимиздан Умра сафарига бориш учун кетадиган маблағни камайтиришини сўрайман. Муқаддас даргоҳга бориш ҳар бандага насиб қилсин”, –  дейди фарғоналик гул сотувчи аёл

Сарвар Зияев, Kun.uz мухбири
Монтаж устаси: Абдусалим Абдувоҳидов.