“Ўзэкспомарказ” МКМда “UzCharmExpo-2022” чарм, пойабзал, атторлик, мўйна, жун ва маҳаллийлаштирилган маҳсулотлар 13-Халқаро кўргазма-ярмаркаси бўлиб ўтмоқда. “Ўзчармсаноат” уюшмаси ҳамда Ўзбекистон Республикаси инвестициялар ва ташқи савдо вазирлиги мазкур нуфузли форум ташкилотчиларидир.
Йилда икки марта - баҳор ва кузда ўтказиладиган мазкур кўргазма ўзаро манфаатли ҳамкорликни йўлга қўйиш, икки томонлама алоқаларни ўрнатиш, ишбилармонлик портфелини янги бизнес лойиҳалар билан бойитишда самарали майдон саналади.
“UzCharmExpo-2022” Марказий Осиёдаги чарм-пойабзал ва мўйна саноатининг энг йирик ихтисослаштирилган кўргазмасидир. 13-халқаро кўргазмада иштирок этиш мақсадида 450 га яқин маҳаллий ва 20 дан ортиқ хорижий давлатларнинг 70 дан ортиқ компаниялари 5 000 га яқин маҳсулот намуналари билан иштирок этишмоқда. Шунингдек, 2 500 яқин маҳаллий ва хорижий компаниялар вакиллари кўргазмага ташриф буюриш мақсадида рўйхатдан ўтди. Анжуман нафақат Ўзбекистон ҳудудлардаги ишлаб чиқариш салоҳиятини намойиш қилади. Балки, кўплаб мамлакатларнинг соҳа мутахассислари учун мулоқот майдонига айланмоқда.
Жорий йилги анжуман иштирокчилари географиясига назар ташласак, унда Буюк Британия, Италия, Германия, Ҳиндистон,Туркия, Испания, Венгрия, Россия, Белорусь, Полша, Латвия Хитой каби кўплаб чарм-пойабзал саноати ривожланган давлатларнинг корхоналари ва брендларини кўриш мумкин. Фахрий меҳмонлар орасида Халқаро чарм ишлаб чиқарувчилар кенгаши, Халқаро мўйна федерацияси, қатор давлатларнинг миллий уюшмалари, чарм ишлаб чиқарувчилар, пойабзал ва мўйначилик кенгашлари ва тадбиркорларни учратасиз.
“Ўзчармсаноат” уюшмаси таркибига кирувчи чарм, пойабзал, чарм-атторлик, мўйна ва қоракўл маҳсулотлари ишлаб чиқаришга ихтисослашган корхоналар, ташқи савдо ваколатхоналари ва мода уйлари билан ҳамкорликни кенгайтириш орқали 2022 йилда экспорт ҳажмини 500 млн долларга етказиш кўзда тутилмоқда. Бу ўтган йилга нисбатан 118,8 фоизга кўпдир. Маҳсулотлар экспорти дунёнинг 42 дан ортиқ мамлакатларида амалга оширилади.
Соҳа ривожи учун яратилаётган кенг имкониятларни инобатга олган ҳолда 2022 йил охиригача мамлакатимиз чарм-пойабзал соҳасида 120 та инвестиция лойиҳасини амалга ошириш, бунда 50 та янги корхона ташкил этиш, 70 та корхонани модернизация қилиш режалаштирилган. Соҳага жалб қилинган инвестицияларнинг умумий ҳажми 176 миллион АҚШ долларини ташкил этиб, ўн мингдан ортиқ янги иш ўринлари яратилиши кутилмоқда. Шунингдек янги иш ўринларига мамлакатимиз Олий таълим муассасалари ва касб-ҳунар коллежлари битирувчиларини жойлаштиришга устувор аҳамият қаратилиши кўзда тутилган.
Маҳаллий чарм, пойабзал, жун ва мўйна саноатининг энг фаол таклифлари уч кунлик кўргазма “UzCharmExpo 2022” стендларида тақдим этилмоқда. Шунингдек, ёш дизайнерларнинг модалар коллекцияси намойиш этилди.
“UzCharmExpo-2022” нафақат компанияларнинг салоҳияти, маҳсулот ассортименти ва соҳадаги инновациялар билан танишиш имконияти, балки, B2B ва G2B музокаралари учун самарали платформадир. Кўргазма доирасида бизнес-мулоқотлар ва тақдимотлар бўлиб ўтмоқда.
“UzCharmExpo-2022” халқаро кўргазмаси 14 октябрга қадар давом этади.
