Портлаш жума куни маҳаллий вақт билан соат 18:15 да, Туркиянинг Қора денгиз соҳилидаги Бартин провинцияси Амасра районидаги давлат кўмир конида рўй берган.
Мамлакат аҳолиси учун бу шу каби бошқа фалокатларни ёдга солиши билан ҳам оғриқли бўлди, биринчи навбатда 2014 йилги фалокатни - ўшанда мамлакат ғарбидаги конда чиққан ёнғин 300 дан ортиқ кончини ҳаётдан олиб кетганди.
Шанба куни Туркия ички ишлар вазири Сулаймон Сойлу журналистларни 58 нафар кончи ичкаридан ўзи чиқиб келгани ёки қутқарувчилар томонидан олиб чиқилгани, улардан 11 нафари жароҳатлангани ҳақида хабардор қилди. Ўша вақтда ҳалок бўлган кончилар сони 40 нафарни ташкил этаётган, портлаш вақтида конда ишлаётган бўлган яна бир киши бедарак йўқолган деб ҳисобланаётганди.
«Амасрадаги кўмир конида портлаш 41 кишини ҳаётдан олиб кетди. Ушбу фавқулодда ҳодиса ҳар томонлама ўрганилади» - деди президент Эрдўған. Ўз чиқишида ҳукумат келгусида бу каби фожиалар рўй беришининг олдини олиш учун барча имкониятлар ишга солинишини қайд этган.
Қутқарув амалиёти портлашдан кўп ўтмай бошланган. Яраланганларга фавқулодда ёрдам кўрсатиш учун авиация ишга солинган.
Қутқарув бригадалари юзлаб метр чуқурликка тушиб, харобалар орасидан омон қолганларни топиш учун тун бўйи ишлаган.
Воқеа жойида олинган видеокадрларда қутқарувчилар юзи қорайиб кетган кончиларни юқорига қандай олиб чиқаётгани, кончиларнинг оила аъзолари ва яқинлари шу атрофда хавотир билан янгилик кутиб тургани акс этган.
Метан портлаши эҳтимоли
Сойлунинг маълумотига кўра, портлаш 300 метр чуқурликда рўй берган. Бу чуқурликда 49 киши ишлаган бўлиши мумкин. Унинг сўзларига кўра, бу вақтда конда жами 110 нафарга яқин киши бўлган.
