2022 йилда ҳокимларнинг 1 339 та қарори судлар томонидан ҳақиқий эмас деб топилган – Олий суд

Олий суд ахборот хизматининг маълум қилишича, 2022 йилнинг 9 ойи давомида маъмурий судлар томонидан оммавий-ҳуқуқий муносабатлардан келиб чиқадиган 11 525 та иш кўриб чиқилган ва 5 589 нафар жисмоний ва юридик шахснинг ҳуқуқлари тикланган.

Жумладан, 9 ой ичида маъмурий ва фуқаролар ўзини ўзи бошқариш органларининг, улар мансабдор шахсларининг қарорлари устидан шикоят қилиш тўғрисидаги 7 004 та иш кўриб чиқилган. Чунончи, ҳоким қарорини ҳақиқий эмас деб топиш билан боғлиқ кўриб тамомланган ишлар сони 3 665 тани ташкил қилиб, шундан жисмоний ва юридик шахсларнинг 1 339 та аризаси қаноатлантирилган.

Вилоят ва унга тенглаштирилган маъмурий судлар томонидан апелляция тартибида 2 835 та иш кўриб чиқилиб, қуйи судлар томонидан чиқарилган 429 та қарор бекор қилинган, 52 та қарор эса ўзгартирилган.

Олий суд маъмурий ишлар бўйича судлов ҳайъати томонидан кассация тартибида 2 213 та шикоят ва протест ўрганилиб, шундан 1 096 таси иш материаллари асосида кўриб чиқилган. Натижада қуйи судлар томонидан чиқарилган қарорларнинг 166 таси бекор қилинган, 4 таси ўзгартирилган.

Шунингдек, кассация инстанциясида 36 та иш такроран кўриб чиқилиб, 28 та суд қарори бекор қилинган.

Аввалроқ Хоразм вилояти маъмурий суди ҳақиқий эмас деб топилган ҳоким қарорлари сони қарийб 2 баробар ошганини маълум қилганди.

Олий судга кўра, 2021 йилнинг дастлабки 6 ойи давомида ҳокимларнинг энг кўп ҳақиқий эмас деб топилган қарорлари Тошкент (186), Хоразм (167) ҳамда Андижон вилоятлари (112) ҳиссасига тўғри келган.