Томскдан сафарбар қилинганлар икки ҳафтадан буён Луҳанскдаги ўрмонда яшириниб ётгани маълум бўлди

Томск области Первомайский районидан сафарбар қилинганлар аннексия қилинган Луҳанск области ҳудудидаги ўрмонда яшириниб ётган. Улар ҳарбий қисмга қайтиб кела олмайди, чунки у ерда жанговар ҳаракатлар ҳудудини тарк этганликлари учун дезертирлик бўйича жиноий иш қўзғатилиши таҳдид солмоқда. Бу ҳақда «Сибирь.Реалии» сафарбар қилинганлардан бирининг онаси Елена Солодовниковага асосланиб хабар берган.

Аёлнинг сўзларига кўра, унинг ўғли 26 сентябр куни сафарбар этилган. Унга Омскдаги ҳарбий қисмда уч ой давомида ҳарбий тайёргарликдан ўтказиш ваъда қилинган, аммо бунинг ўрнига уни ва бошқа чақирилганларни Екатеринбургга олиб кетишган. Бу ерда уларга формалар берилган ва 29 сентябр куни Ростов областидаги чегара қисмига етказишган. Бир ҳафта ўтиб эса сафарбар қилинганлар Луҳанск областига олиб борилган. «Сибирь.Реалии» манбаси маълумотига кўра, икки қисмда ҳам сафарбар қилинганларни «тўп еми» деб аташган.

Луҳанск областида сафарбар қилинганлар миномёт зарбасига йўлиққан ва чекинишга мажбур бўлган. Солодовникованинг айтишича, жанг майдонида қўмондонлик бўлмаган, сафарбар қилинганлар орасидаги сержантни гуруҳ бошлиғи этиб тайинлашган, аммо у нима қилиш кераклигини тушунмаган. «Улар пиёда йўлга чиқишган, ҳеч қандай техника бўлмаган. Автоматлар бўлган, аммо улар танкка қарши автомат билан боришадими?» — дейди сафарбар қилинганлардан бирининг онаси.

Натижада гуруҳ ўрмон ичкарисига қочган. Улар қариндошлари билан сўнгги бор 17 октябр куни алоқага чиқишган. «Улар ҳозир ўз ҳолига ташлаб қўйилган. Палаткадан қандайдир чодир тикишади, кундузи исиниш учун гулхан ёқишади, кечаси ўчиришади», — деган Солодовникова.

Ҳарбий хизматчиларнинг яқинлари ёрдам сўраб Давлат думасига Томск областидан депутат бўлган Татьяна Соломатинага мурожаат қилишган. Улар «сафарбар қилинганлар учун нормал қўмондонлик» беришни ва уларни ҳарбий тайёргарликдан ўтказишни сўрашган, аммо депутат «офицерлар дезертирлар билан ишлашдан бош тортиши» ҳақида айтган. Сафарбар қилинганларнинг қариндошлари губернатор офисига уларнинг яқинлари ҳеч қандай тайёргарликсиз ҳарбий ҳаракатлар ҳудудига йўллангани, уларда қўмондонлик, ўқ-дори ва озиқ-овқат захиралари бўлмаганидан шикоят қилиб мурожаат этишган, бунга жавобан мурожаат кўриб чиқиш учун қабул қилинганини айтишган.