Нэнси Пелоси Вакиллар палатаси спикерлигидан кетади

82 ёшли Пелоси Конгрессдаги энг нуфузли демократ ҳамда Вакиллар палатаси спикери бўлган илк аёл ҳисобланади.

У Конгресснинг қуйи палатасида Калифорния округи вакили сифатида фаолиятини давом эттиради.

Унинг кетиши оралиқ сайловлардан кейин республикачилар Вакиллар палатасида назоратни қайтариб олаётгани билан боғлиқ.

Республикачи Кевин Маккарти Конгресснинг янги спикери бўлиш учун номзодини илгари сурди ва катта эҳтимол билан айнан у бу лавозимда Пелосининг ўрнига келади.

«Мен ҳеч қачон уй бекасилигидан Вакиллар палатаси спикери лавозимига қадар йўлни босиб ўтаман деб ўйламагандим», — дея тан олади Пелоси ўз баёнотида.

«Мен навбатдаги чақириқда Демократик партия раҳбарлигига қайта сайланишга интилмаяпман. Янги авлодга ўзим ҳурмат қиладиган демократлар фракциясини бошқариш ҳуқуқини бериш вақти келди», — деган у.

Пелоси Конгресснинг янги таркиби иш бошлайдиган январга қадар спикерликни давом эттиради, кейин эса 2025 йил январига қадар унда конгрессмен сифатида қолади.

Нью-Йорк штатидан конгрессменликка сайланган Ҳаким Жеффрис Вакиллар палатасида демократлар етакчилигини ўз қўлига олиши кутилмоқда - бу орқали у АҚШ тарихида бундай лавозимни эгаллаган илк қора танли сиёсатчига айланади.

Вакиллар палатаси спикери — АҚШ Конституциясида кўрсатилган лавозимдир. Бу АҚШда президент ва вице-президентдан кейинги учинчи энг муҳим лавозим ҳисобланади — юқоридаги лавозим эгалари ваколатини бажаришга лаёқатсиз бўлиб қолганида айнан спикер президентликка ўтиши мумкин.

Спикер, унинг ўринбосарлари ва қўмиталар раислари қайси қонун лойиҳалари кўриб чиқилиши ва овозга қўйилишини ҳал қилишади. Улар кун тартибини белгилашади ва дебатларни тартибга солувчи қоидаларни ўрнатишади.

***

Конгрессдаги йирик партияни бошқарган илк аёл сифатида Нэнси Пелоси Вакиллар палатасининг энг самарали етакчиларидан бири сифатида тарихга кирди — у демократлар учун бебаҳо бойлик, республикачилар учун даҳшатли рақиб, деб ёзади BBC’нинг Вашингтондаги мухбири Энтони Зуркер.

«Қонунчилик зийраклиги, керак бўлганда партияни бирлаштира олиш қобилияти, шунингдек сиёсий ўйинчи сифатидаги инстинкти Нэнси Пелосини Капитолий тепалигидаги жиддий кучга айлантирганди», дея хулоса қилади нашр корреспонденти.

Нэнси Пелоси илк бор 1987 йилда Конгрессга сайланган.

Пелоси 2003 йилда озчилик фракцияси раҳбарига айланади — ўшанда бу лавозим Вакиллар палатасидаги мухолифатлар етакчилиги эди.

2006 йилда демократлар сўнгги ўн йилдан ортиқ вақт ичида илк бор Вакиллар палатасини ўз назоратига олади ва у Конгрессдаги йирик партияни бошқарган илк аёл бўлади.

Пелоси тўрт йил ўтиб яна палатадаги озчилик етакчиси бўлади, аммо 2018 йилда спикерлик лавозимига қайтади ва ўша пайтда АҚШ президенти бўлган республикачи Доналд Трампнинг асосий сиёсий рақибига айланди. 2021 йилнинг ноябрида Ненси Пелоси яна икки йилга Вакиллар палатаси спикери этиб сайланди.

Сиёсатчи халқаро майдонда бир неча бор ўзига эътиборни тортган. 2022 йил август ойи бошида Пелосининг Тайванга ташрифидан сўнг Хитой америкалик аёл ва унинг оила аъзоларига нисбатан санкциялар жорий қилди. Сентябрь ойида АҚШ Конгресси Вакиллар палатаси спикери Арманистон ва Озарбойжон чегарасидаги тўқнашувлар юзасидан баёнот бериб, улар учун Бокуни айблаган эди.

Пелосининг сайловолди кампанияси эрига қилинган ҳужум соясида қолди. ОАВ маълумотларига кўра, жиноятчи сиёсатчининг Сан-Францискодаги қароргоҳига бостириб кириб, Пол Пелосига болға билан ҳужум қилган, шундан сўнг 82 ёшли эркак касалхонага ётқизилган. Dpa агентлигига кўра, ҳужум аслида Пелосининг ўзига қарши режалаштирилганди. Бу вақтда у Вашингтонда бўлган.