Трамп бу ҳақда 20 октябр куни Оқ уйнинг Овал кабинетида журналистлар билан суҳбатда айтган. DW хабарига кўра, мулоқот АҚШ президенти маъмуриятининг YouTube каналида намойиш этилган.
«Менимча, улар буни бошқача йўл билан ҳам амалга ошириши мумкин. Уларга бир хонада бўлиш қийин. Келишувга қандай эришилиши мени қизиқтирмайди», — деган Трамп.
АҚШ президенти Владимир Путин ва Володимир Зеленский ўртасида «улкан» нафрат борлиги ҳақидаги фикрини ҳам такрорлаган.
Шунингдек, у Украина раҳбари урушни тўхтатиш бўйича келишувга интилиши кераклигини таъкидлаган.
«У келишувга боришни хоҳлаши керак бўлади, чунки, менимча, унинг халқи бунга ортиқ чидаб турмайди», — деган Трамп.
АҚШ президенти Вашингтон Украинага катта ёрдам кўрсатганини, аммо бунинг эвазига «қайғу, ўлимлар ва улкан молиявий йўқотишлардан бошқа ҳеч нарса олмаганини» даъво қилган. Унинг айтишича, америкалик солиқ тўловчилар ҳам, Европа Иттифоқи мамлакатлари ҳам Украинани молиявий қўллаб-қувватлашдан чарчаган.
Суҳбатда Россия қамоғидаги 73 ёшли америкалик Стивен Ҳаббард масаласи ҳам кўтарилган. Трамп Путин билан мулоқотида уни озод қилишни сўраганини билдирган.
Ҳаббард 2024 йил октябрда Россияда ёлланма жангчилик моддаси бўйича олти йил-у ўн ойга озодликдан маҳрум қилинган. Россия тергови талқинига кўра, у 2014 йилдан Украинада яшаган, 2022 йил февралда Харкив вилоятининг Изюм шаҳри ҳудудий мудофаа сафига қўшилган ва апрелда Россия ҳарбийлари томонидан қўлга олинган.
AFP агентлиги аввалроқ Ҳаббард Россия қамоғида қийноққа солингани ҳақида хабар берган эди.
