АҚШ Конгресси Вакиллар палатаси спикерининг эрига уйида ҳужум уюштирилди

ОАВ маълумотларига кўра, ўша пайтда уйда бўлмаган Ненси Пелосининг турмуш ўртоғига болға билан қуролланган эркак ҳужум қилган.

Пол ва Ненси Пелоси / Фото: Reuters

АҚШ Конгресси Вакиллар палатаси спикери Ненси Пелосининг турмуш ўртоғи ҳужумга учради, шундан сўнг у касалхонага ётқизилди. Бу ҳақда 28 октябр, жума куни спикер матбуот хизмати хабар берди.

Ҳужум жума куни кечқурун содир бўлди, жиноятчи Сан-Францискодаги Пелосининг қароргоҳига бостириб кириб, Пол Пелосига «шафқатсизларча ҳужум қилди», дейилади матбуот хизмати хабарида. «У қўлга олинди, ҳужум сабаблари ўрганилмоқда. Жаноб Пелоси касалхонага олиб кетилган, у ерда унга биринчи даражали тиббий ёрдам кўрсатилмоқда ва у тўлиқ тузалиб кетиши кутилмоқда», - дейилади хабарда.

NBC телеканалига кўра, жиноятчи болға билан қуролланган бўлган ва уйда Ненси Пелосини топишга уринган. CNN телеканалининг икки манбасига кўра, ҳужумчи Пол Пелосини «Ненси уйга қайтгунча» боғлаб қўймоқчи бўлган ва уйга бостириб кириб «Ненси қаерда?» дея бақирган. Полиция қароргоҳга етиб келганида, жиноятчи яна «Ненсини кутаётганини» айтган.

Вакиллар палатаси спикерининг ўзи ҳужум вақтида Вашингтонда бўлган ва воқеадан хабар топганидан кейин Сан-Францискога учиб кетган. CNN хабарига кўра, у операция олдидан эри билан гаплашган.