Бир йил муқаддам йўғон ичакдаги ўсимтасини жарроҳлик йўли билан олдириб ташлаган 82 ёшли Пеле 29 ноябр куни Сан-Паулудаги шифохонага ётқизилганди, ўшанда бу ҳар ойдаги одатий ташриф экани айтилганди.
Ўтган ҳафтада Пелега нафас йўллари инфекцияси ташхиси қўйилди, жума куни Сан-Паулудаги Альберт Эйнштейн шифохонасида унинг ҳолати барқарорлашгани хабар қилинди.
Аммо 3 декабр куни Бразилиядан Пеле энди химиятерапияга реакция қилмаётгани ва паллиатив (беморга вақтинча енгиллик берувчи дори ёки восита) курс ёрдами олаётгани ҳақида хабарлар келди.
Шанба куни кечқурун Сан-Паулудаги шифохонадан Пеле «ҳамон даволанишда давом этаётгани ва унинг ҳолати барқарорлигича қолаётгани» хабар қилинди.
Шанба куни унинг ўзи «кучли ва умидга тўла» экани ҳақида хабар қилди. «Мен ҳар бир киши хотиржам бўлиши ва позитив қолишини истайман», дейилади Пеленинг инстаграм саҳифасида.
«Қирол учун ибодат қилинг»
Буюк футболчини қўллаб-қувватлаш сўзлари бутун дунёдан келмоқда.
«Қирол учун ибодат қилинг», - дея ёзди Франция термаси ҳужумчиси, айни вақтда жаҳон чемпионатида иштирок этаётган Килиан Мбаппе.
Жаҳон чемпионатининг уч карра ғолиби 2021 йил сентябрида йўғон ичакдаги ўсимтасини жарроҳлик йўли билан олдириб ташлаган ва шундан буён доимий равишда даволаниш курсларини ўтаб келаётганди. 2022 йилда учта хавфли ўсма ва сийдик йўллари инфекциясини даволаш учун икки марта шифохонага ётқизилган эди.
Шанба куни Англия терма жамоаси сардори Ҳарри Кейн шундай деди: «Унинг касаллиги ҳақидаги ҳақидаги хабарни эшитиб жуда хафа бўлдик, аммо биз, бутун Англия терма жамоаси унга саломатлик тилаймиз. У илҳомлантиради, ақл бовар қилмас инсон».
Германиялик собиқ жаҳон чемпиони Юрген Клинсманн шанба куни BBC’нинг жаҳон чемпионати бўйича эфирида шундай деди: «Пеле - шунчаки ажойиб инсон. Жаҳон футболидаги тенги йўқ шахс. Биз шунчаки дуода бўлишимиз ва яхшиликдан умид қилишимиз мумкин, аммо бу жуда қайғули хабар».
Аргентиналик собиқ ҳимоячи Пабло Сабалета BBC эфирида қўшимча қилди: «Пеле ҳақида бундай хабар эшитиш жуда қайғули. У бизнинг барчамизни майдонда ҳам, ундан ташқарида ҳам илҳомлантирган. У ҳамиша буюк инсон бўлиб қолган».
