DW нашрининг Бразилия сайлов органи маълумотларига таяниб ёзишича, 5 октябрга ўтар кечаси бюллетенларнинг 99,99 фоизи санаб чиқилган. Натижаларга кўра, Рио-де-Жанейро штатидан сенатор Флавиу Болсонару амалдаги давлат раҳбарини 1,87 фоиз пунктга ортда қолдирган.
Сайловда қатнашиш кўрсаткичи 78,92 фоизни ташкил этган. Биринчи турда ҳеч бир номзод 50 фоиздан ортиқ овоз тўпламагани учун президентлик масаласи такрорий овоз беришда ҳал бўлади.
Бу галги рақобат Болсонарулар оиласининг ҳокимиятга қайтишга уриниши сифатида ҳам кўрилмоқда. 2022 йилги президентлик сайловининг иккинчи турида Лула да Силва Флавиунинг отаси — ўша пайтдаги президент Жаир Болсонаруни мағлуб этган эди.
Жаир Болсонару ўшанда овоз бериш натижаларини тан олмаган, унинг тарафдорлари эса норозилик намойишларига чиққан. Кейинчалик собиқ президент давлат тўнтаришига уриниш иши бўйича узоқ муддатли қамоқ жазосига ҳукм қилинган.
Болсонарулар оиласининг яна бир вакили — Эдуарду Болсонару ҳам суд ҳукмига дуч келган. Манбага кўра, Бразилия Олий суди 2026 йил июнида уни тўрт йил-у икки ойга озодликдан маҳрум қилган. Бунга унинг отасига чиқарилган ҳукм сабаб АҚШни Бразилияга қарши санкциялар жорий этишга чақиргани асос бўлган. АҚШда яшаётган Эдуардуга нисбатан иш сиртдан кўриб чиқилган.
Президентлик учун курашаётган 45 ёшли Флавиу Болсонару сайловолди кампаниясида жиноятчиликка қарши курашишни асосий ваъдаларидан бири сифатида илгари сурган. Бироқ унинг ўзи ҳам аввал коррупция ва маблағларни ноқонуний ўзлаштиришга оид гумонлар билан боғлиқ ишлар марказида бўлган.
Хусусан, 2019 йилда сиёсатчига нисбатан амалда ишламаган, аммо ходимлар рўйхатига киритилган шахслар учун тўловлар олиш ҳамда банк ҳисобварағига шубҳали пул ўтказмалари юзасидан ишлар очилган.
Нашр Флавиунинг номи Banco Master банки атрофидаги можарода ҳам тилга олинаётганини қайд этган. Банк ва унинг йирик акциядори Даниэл Воркару бажариб бўлмайдиган юқори даромад ваъдалари орқали давлат ва хусусий фондлардан ўнлаб миллион доллар инвестиция жалб қилишда гумон қилинмоқда. Тергов эҳтимолий молиявий пирамидага оид ҳолатларни ўрганмоқда.
Воркару Жаир Болсонару ҳақидаги «Қора от» биографик фильмининг продюсерларидан бири сифатида ҳам танилган. ОАВда унинг Флавиу Болсонару билан ёзишмалари эълон қилинган. Нашр талқинича, бу ёзишмалар сиёсатчининг эҳтимолий схема ҳақида хабардор бўлгани ва унга кўмаклашгани ҳақида саволлар туғдиради. Бироқ келтирилган маълумотлар Флавиунинг мазкур иш бўйича айби судда исботланганини англатмайди.
