Инсон қадрига фарғонача "муносабат": Шифокорлар ва беморларнинг куни чойхона биносига қолди
|16:10 / 17.12.202212 4196 мин
Фарғона вилояти Риштон тумани “Қайрағоч” МФЙдаги оилавий шифокорлик пункти икки йилдирки чойхона биносида фаолият кўрсатади. Ҳолати абгор бўлган тиббиёт маскани 2020 йил апрел ойида қишлоқдаги чойхоналардан бирига вақтинча кўчирилган эди. Янги бино фойдаланишга топширилишида кечикишлар сабаб аҳоли азият чекмоқда.
Маълум бўлишича, тендерда ғолиб бўлган “Universal Proekt Servis” хусусий корхонаси томонидан Оилавий шифокорлик пунктида капитал таъмирлаш ишлари бошланган.
Бино 2021 сентябр ойида фойдаланишга топширилиши керак эди. Лекин бинода ишлар чала ташлаб кетилган.
Табибнинг ўзи бемор...
“Ҳозирги ишлаётган жойимиз аслида чойхона биноси бўлган. Авария ҳолатига келиб қолган бинода қурилиш бошланган пайтда чойхонага кўчиб ўтдик.
Мадибобоева Мастура, ҳамшира
Шу йил иккинчи йил шу бинода қишлашимиз. Касал бўлмаган ходимлар қолмади. Ўзим ҳам мажбурликдан ишлаяпман. Боқа-чақани боқиш керак-ку. Тепадан иш талаб қилишади. Ноиложликдан совуқ хонада ўтирамиз. Қишлоғимиз катта. 5 300 нафар аҳолига хизмат кўрсатамиз. Жами 22 ходим ишлайди.
2 йил деганда янги бино қуриб битказилди. Нима сабабдан кўчмаяпмиз, билмайман. Бино битгач, тозалаб ҳам келдик. Иситиш тизимида муаммо бор дейишди”, – дейди ОШП ҳамшираси Мастура Мадибобоева.
Оилавий шифокорлик пункти ўт ёқувчиси Ғайратжон Ҳакимов қурувчи томонидан ишлар чала ташлаб кетилганини таъкидлади.
“Аввалги қишлоқ врачлик пункти яроқсиз ҳолга келган эди. 2020 йилда бузилиб янгиси қуриладиган бўлди. Усталар келиб қурилиш ишлари бошланди ҳам. Лекин бино битгани билан жуда кўп муаммолари бор. Кўп ишлар чала қолиб кетди.
Мавзуга оид
Келаётган беморларга хизмат кўрсатиш жуда қийин. Қиш пайти “свет” йўқ. бераётган кўмирлари жуда сифатсиз. Иложсизликдан тупроққа ўхшаган кўмирга сув аралаштириб ёқяпмиз.
Ҳамширалар янги бинони тезроқ битириб, чойхона биносидан кўчириб беришларини сўраб бормаган жойлари қолмади. Қурилган янги бинода муаммо тўла. “Котёл”ни ёқсангиз, исийди дейишди. Лекин бу иситиш тизими ишламаяпти,” – дейди Ғайратжон Ҳакимов.
“Ҳамшираларимиз икки йилдирки чойхона биносида касалларни даволаб келишяпти. Яқинда турмуш ўртоғим бу ерга келиб даволаниб шамоллаш касалини орттириб кетди. Бино совуқлигидан уйдан кўрпа-тўшак олиб келиб укол қилдириб кетаётган эдик. Энди эса йўтал бўлиб ётиб қолди. Чойхона ўрнида ўтирган ҳамшираларга жуда қийин. Ҳамширалар оғир шароитда ишлашга мажбур бўляпти. Туман марказидаги поликлиникага бориш узоқлик қилади. Пенсияга яшасак ўзи. Ортиқча харажат оғирлик қилади”, – дейди у.
“Раҳбарлар мурожаатларимизга эътибор қаратишмаяпти” – Азиза Бегматова
Азиза Бегматова
“Раҳбарлардан тезроқ янги бинони битириб беришларини сўраймиз. Совуқ кунларда қийналиб кетдик. Осма укол олгунимизча совқотиб кетяпмиз. Янги бино битганига бир йилдан ўтди. Аҳолининг чиқмаган жойи қолмади. Биз айтганимиз билан мурожаатларимизни раҳбарлар инобатга олишмаяпти. Мана бугун укол олишга келдим. Муолажа хоналари бемор билан тўлган.
Совуқ кунда беморлар жой бўшатишини кутиб ташқарида кутиб турибмиз. Янги бинода кутиш жойи бор. Ичкарига кириб навбатимиз келишини кутиб ўтирамиз”, – дейди у.
Риштон тумани Тиббиёт бирлашмаси муҳандиси Баҳодир Аҳмаджонов муаммолар тез орада бартараф қилиниши, оилавий шифокорлик пунктини бир ҳафта ичида янги бинога кўчиришга ваъда берди.
Баҳодир Аҳмаджонов
“Қишлоқ врачлик пункти 2021 йилда янгидан қурилди. Бино битгандан кейин электр токи билан боғлиқ муаммо юзага келди. 3 фазали ток 500 метр масофадан тортиб келиниши керак эди. Бинога электр тармоғи тортиш ишлари қурилиш фирмаси сметасига киритилмаган экан. Шу сабабли фойдаланишга топширилиши анча кечикди.
Электр таъминоти бўйича ёрдам сўраб ҳокимият ва электросетга мурожаат қилдик. Қурувчи ўз ёнидан кабел олиб келди. Муаммо деярли ҳал бўлди. Лекин айнан электр таъминоти сабаб бино фойдаланишга топширилиши 1 йилга чўзилиб кетди.
Энди ток бор, бинони иситиш эса муаммога айланди. Биз яна бу борада ҳокимиятга мурожаат қилдик. Барча муаммоларни бартараф қилиб, бир ҳафта ичида янги бинога кўчиб ўтамиз”, – дейди у.
Оилавий шифокорлик пунктининг янги биноси
Ҳолат бўйича изоҳ олиш “Universal Proekt Servis” қурилиш ташкилоти иш бошқарувчиси Аббосхон Маҳмудов билан телефон орқали боғландик. У бино қуриб фойдаланишга топширилганига 2 йил бўлгани, шу давр мобайнида тиббиёт муассасасига электр токи тортиб келиш ишларида ёрдам сўраб туман ҳокимлиги, прокуратура, туман электр тармоқлари корхонасига мурожаат қилингани, лекин мутасаддилар ваъдасини бажармаганини айтди. Қурувчининг қўшимча қилишича, бинога электр таъминоти тортиб келишда кечикиш бўлгани сабаб муаммолар келиб чиққан.
Риштон тумани ҳокимининг қурилиш ишлари бўйича ўринбосари Нозимхўжа Ориповнинг Kun.uz мухбирига маълум қилишича, тиббиёт муассасасига электр тармоғи тортиш ишлари сметага киритилмагани сабабли масала юзасидан тортишувлар бўлган. Бундан ташқари қурувчи таъмирлаш ишларини чўзиб юборган. Ҳокимият томонидан 18 миллион сўм маблағ ажратилгандан сўнг бинога электр тармоғи тортиб келинган.
Мақола тайёрланиши жараёнида Риштон тумани тиббиёт бирлашмаси раҳбарияти томонидан оилавий шифокорлик пунктига иситиш ускуналари олиб борилгани, янги бино бугун 17 декабр куни фойдаланишга топширилиши маълум бўлди.
