“Уй ичидан ўт ўсиб чиқяпти” – Риштондаги намунасиз уйларнинг аҳволи

Фарғона вилояти Риштон тумани Янгийўл маҳалласида 2019 йилда фойдаланишга топширилган намунали уйларнинг деворлари ёрилиб, пойдеворлари чўкиб, кундан кунга харобага айланиб боряпти. Фуқаролар ойма-ой кредит тўлашга мажбур, қурувчи эса уйлар сифатли қурилганини даъво қиляпти.

Kun.uz'га мурожаат қилган мулкдорларнинг айтишича, муаммо тегишли идоралар томонидан ўрганилган ҳам, лекин амалий натижа бўлмаяпти.

“Юрак ҳовучлаб яшаяпмиз”

Адҳамжон Муҳаммадалиев:

— Яшаётган уйимизни 2018 йилда шартнома асосида кредитга олган эдик. Уйни 2019 йилнинг июн ойида битказиб топширишган. Бошланғич тўлов 17 млн сўм бўлган. Шартнома қилишдан аввал лойиҳаларни кўрган эдик, маъқул келганди.

Уйни қабул қилиб олдик, лекин ўшанда ҳам битмаган, чала жойлари бор эди. “Ҳа майли, ўзимиз қилиб оламиз” деб олаверганмиз-да. Орадан бир йил ўтиб, бир қишни, ёғингарчиликни кўрганидан кейин деворларда ёрилишлар пайдо бўлди. Ҳолат бўйича тегишли ташкилотларга чиққанимизда келиб ўрганишиб, “яшашга яроқли” дея хулоса бериб кетишди.

Вақт ўтиши билан уйнинг ҳолати ёмонлаша бошлади. Қайта таъмирладик. Таъмирдан кейин яна қайта ёрилишлар кузатилди. Ямоқ жойини ямаймиз, ёриқ жойини тузатамиз, кейинги йилга яна ўша ҳолига қайтиб қолаверади. Поллар чўкиб кетган, уйнинг бир тарафи “ташлаб юборган”, чўкиб қийшайиб ётибди. Ҳозир ҳам асосий деворлар ёриқ.

Шу маҳалланинг ўзида 100 дан ортиқ намунали уйлар қурилган. Уларнинг кўпи абгор ҳолатга келиб бўлди. Қисқа қилиб айтганда, бизга ваъда қилинган лойиҳадаги уйнинг 50 фоизи ҳам амалга ошмаган.

Ҳеч кимнинг бошига солмасин, агар кучлироқ зилзила бўлса уй бизни босиб қолади. Сейсмик бардошлик деярли йўқ. Юрак ҳовучлаб яшаяпмиз.

Поллар 5-10 сантиметр чўккан. Асосий девор чўккани учун уйни ушлаб турадиган бошқа бир девор ҳам ёрилиб кетган. Ғиштлари, плиталари ҳам ёрилган. Кечалари дирсиллаган ёриқ овозларини эшитамиз.

Муаммони ҳал қиламан деб, тегишли ташкилотларга қилган мурожаатларим билан ярим сандиқ жавоб хати йиғдим, натижа эса йўқ.

Уйни бузиб ташлаб, қайта қурмаса бўлмайдиган аҳволда. Бошқа чорасини кўрмаяпман. Қурувчи билан гаплашсам, айбни ўзимизга ағдаряпти. “Авария” ҳолатига келиб бўлган уйни таъмирлаб берай демайди.

“Уйимдан ўт ўсиб чиқяпти...”

Муродил Акбаров:

— Эшитганларга кулгили, эриш туюлиши аниқ: мен яшайдиган уйнинг ичидан ўт ўсиб чиқяпти. Юлавераман, яна ўсиб чиқаверади. Поллар чўкиб кетган, шувоқлари тўкилиб ётибди. Деворлар ёрилиб кетган. Бу кетишда бир-икки йилда уй бизни босиб қолади. Зўрға яшаяпмиз қўрқанимиздан.

Коттежга келганимга беш йил бўлди. Ойма-ой кредит тўлаймиз. Қани энди тўловимиз сифатли уйга амалга ошса экан, бажонидил оғринмасдан тўлардик. Аҳволни қаранг... Яшаб бўлмаяпти-ку. Том босиб қоладими деб қўрқаман, кечаси бемалол ухлай олмайман.

Арз қилаверганимиздан кейин қурувчилар бир-икки марта келиб, айбни униси-бунисига ағдариб қочиб кетишди. Кучлироқ ер қимирласа, аҳволимиз вой бўлади бу кетишда.

Қурувчи: “Уйларни сифатли қурганмиз”

Ҳолат юзасидан намунали уйларни қурган “Мадина” хусусий корхонаси раҳбари Мирзаакбар Мансуров билан телефонда орқали суҳбатлашдик. У уйлар ёрилганини рад этди. Иморатнинг чўкишига эса уй эгаларининг ўзи сабабчи эканини таъкидлади.

“Уйнинг расво бўлганининг сабаби бор: уйни 1-2 йилда уёқ-буёғини оқлаб, косметик таъмир қилиб туриш керак. Деворлар, ғиштлар “чўткий”, мустаҳкам. Лекин уйлар қаровсиз қолиб кетган-да, ҳеч ким қарамаган”, – деди у.

Фирма раҳбарининг сўзларига кўра, Kun.uz'га мурожаат қилган намунали уйда яшовчиларнинг ўзлари иморат тагига атайлаб сув бостириши оқибатида чўкиш ҳосил бўлган.