Тошкент шаҳрининг Яккасарой туманида ўтказилган қабулда фуқароларнинг уй-жой, коммунал хизмат кўрсатиш, тадбиркорлик фаолияти, моддий ёрдам бериш ва маҳаллани обод қилиш масалалари юзасидан мурожаатлари тингланган.
23 феврал куни Сенатнинг Ахборот сиёсати ва давлат органларида очиқликни таъминлаш масалалари қўмитаси аъзолари пойтахтнинг Яккасарой туманида туман ҳокими, Тошкент шаҳар маҳаллий кенгаш депутатлари билан биргаликда фуқаролар қабулини ўтказган.
Қабулда бир нечта фуқаронинг бандлик, “Темир дафтар”га киритиш, субсидия ажратиш борасидаги мурожаатлари жойида ҳал қилинган. Айрим мурожаатларнинг ечими бўйича эса туман ҳокими мутасаддиларига тегишли топшириқ берилган.
Шунингдек, қўмита аъзолари туман ҳокимлигининг ахборот хизмати, ахборот сиёсати ва маҳаллий давлат органларида очиқликни таъминлаш масалалари бўйича доимий комиссияси фаолияти билан ҳам танишган.
