«Миллион бу катта рақам»
Мухбир Путиндан Ғарб Украинага яна бир миллионта снаряд етказиб бериши, бу Россия учун қанчалик хавфли экани ҳақида сўради.
«Миллион кўпми ёки камми? Менимча, бу яхшигина катта рақам. Шу боис бу нарсага жиддий эътибор бериш керак. Биздаги маълумотларга кўра, АҚШ бундай калибрдаги снарядлардан ойига 14-15 мингта ишлаб чиқаради. Украина эса кунига 5 мингтагача снаряд ишлатмоқда. Биздаги манбаларга кўра, АҚШ кейинги йилдан ойига 42 мингта шундай снаряд ишлаб чиқариб, 2025 йилдан эса бу кўрсаткични 75 мингтачага оширмоқчи. 2025 йилда нима бўлишини билмаймиз, шу боис ҳозирги рақамларга қараб иш қилишимиз керак», деди Путин.
Россияда охирги вақтларда снаряд етишмовчилиги билан боғлиқ муаммо тез-тез тилга олинмоқда. Хусусан, «Вагнер» асосчиси Евгений Пригожин ва унинг ёлланма жангчилари Россия бош штабини снаряд етказиб беришдаги сусткашлик учун кўп марта ҳақорат қилган ва хатто хиёнатда айблаган. Путин интервюси давомида бу мавзуга ҳам тўхталиб, РФ мудофаа вазирлиги ҳамда бош штаб келишган ҳолда снаряд сарфига чеклов ўрнатганини маълум қилган. Яъни снаряд кам берилаётгани унинг буйруғи асосида амалга оширилмаётганига ишора қилди.
«Ҳа, биз кўпроқ снаряд ишлатяпмиз. Ҳозир буни муҳокама қилмоқчи ҳам эмасман, лекин мудофаа вазирлиги ва бош штаб келишган ҳолда снаряд етказиб бериш учун лимит ҳам жорий қилишга мажбур бўлишди. Биз ҳозир Украинага миллионта снаряд берилиши ҳақида гапиряпмиз, лекин Россия бундан уч баравар кўп снаряд ишлаб чиқарди. Кўпчилик ҳарбий ишлаб чиқариш саноатимиз бунчалик тез ривожланиб кетишини кутмаганди ҳам. Шундай экан, Украинага келаётган снарядлар сони бизни бу борада хавотирга солмайди, шунчаки бу можарони чўзиб юбориши мумкинлиги боис хавотирли», деди Россия президенти.
Путиннинг сўзларига кўра, бошқа қуроллар ҳам ҳар қанақасига Россияда кўпроқ бўлаверади: «Украинага 400 тадан кўпроқ, 420, 440 та танк етказиб беришмоқчи, лекин биз бу вақтда 1600 танк ясаймиз ёки модернизация қиламиз. Бизда ҳар қанақасига Украинадагидан уч баравар кўп танк бўлади. Авиация ёки бошқа турдаги қуроллар ҳақида гапирмасам ҳам бўлади. Бу борада фарқ ўн бараваргача».
Путин Украинага етказиб берилиши кутилаётган кучсизлантирилган уранли снарядлар мавзусига алоҳида тўхталди. «Албатта, бу оммавий қирғин қуроллари сирасига кирмайди, лекин ундан барибир радиацион чанг чиқади. Бундай қуроллардан фойдаланилгандан кейин Ироқ ва Югославияда онкологик касалликлар кўпайган. Ахир Украина ҳужум қилаётган ерлардаги одамларни ўзиники деб ҳисоблаяпти-ку. Бу қурол нафақат жангда қатнашаётганларга, балки атрофдаги одамларга ҳам салбий таъсир кўрсатади. Ҳа, бизда ҳам бундай турдаги қуроллардан юз минглаб дона бор, лекин улардан ҳали фойдаланганимиз йўқ», деди Путин.
