Моди ва Путин 11 сентябр куни Ню-Деҳлида икки томонлама учрашув ўтказди. Ҳиндистон Ташқи ишлар вазирлиги маълумотига кўра, музокараларда Ҳиндистон–Россия муносабатлари билан бир қаторда Украинадаги уруш масаласи ҳам муҳокама қилинган.
«Мулоқот ва дипломатия — можароларни ҳал қилишнинг тўғри йўли», дея Модининг сўзларини келтирган Ҳиндистон ТИВ.
Учрашув 12–13 сентябр кунлари Ҳиндистон пойтахтида бўлиб ўтадиган БРИКС саммити арафасида ўтказилди.
Ҳиндистон Россия нефтининг йирик импортчиларидан бири ҳисобланади. Мамлакат Россиядан дон маҳсулотларини ҳам харид қилади. Шу сабабли Украинадаги уруш оқибатида Қора денгизда кема қатновининг издан чиқиши Ҳиндистон манфаатларига ҳам таъсир кўрсатмоқда.
Жумладан, июл ойида Одесса яқинида юк кемасига Россия ракета зарбаси оқибатида тўрт нафар ҳиндистонлик денгизчи ҳалок бўлган. Шундан сўнг Ҳиндистон Ташқи ишлар вазирлиги Россиянинг мамлакатдаги муваққат ишлар вакилини чақиртирган эди.
Моди Путинни икки ҳафта ичида иккинчи бор тинчликка чақирди
Бу Модининг сўнгги икки ҳафта ичида Путинга Украинадаги урушни тугатиш масаласида иккинчи бор мурожаат қилишидир.
31 август куни Бишкекда Шанҳай ҳамкорлик ташкилоти саммити арафасида ўтказилган учрашувда ҳам Ҳиндистон бош вазири Россия президентини ҳарбий ҳаракатларни тугатишга чақирган.
Ўшанда Моди «чексиз урушдан урушнинг якунига, ҳарбий ҳаракатларнинг тугашига ўтиш керак»лигини айтган. Путин эса Россия гўё бу йўналишда «ҳаракатланаётгани»ни билдирган.
Ҳиндистон Украинада кенг кўламли уруш бошланганидан кейин ҳам Россия билан иқтисодий алоқаларини сақлаб қолди ва Россия нефтини фаол харид қилишда давом этди. Bloomberg маълумотларига кўра, Ғарб санкциялари остидаги айрим товарлар, жумладан Россия ҳарбий саноати учун зарур бўлган микрочиплар ва дастгоҳлар ҳам Ҳиндистон орқали Россияга етказилган.
Айни пайтда Ғарб давлатлари раҳбарларининг Москва тинчлик музокараларига қанчалик тайёр экани ҳақидаги баҳолари фарқ қилмоқда.
Германия канцлери Фридрих Мерц 9 сентябр куни Россия ҳукумати ва президентининг Украина бўйича жиддий тинчлик музокараларига киришишга тайёрлигини кўрсатувчи белгиларни кам кўраётганини айтган.
