Юлдуз Усмонова: “Олдин кўп унвон олгансан, дейишади. Мени унвонларим билан қўшиб қон қустиришган”

“Олдин менинг бошим ғамдан чиқмас эди. Халқнинг ҳаққини талаб қилиб ҳам бошимда ёнғоқ чақилган. Мен тенгилар билади буни. Ҳар ким динини куйлагиси, динида яшагиси келади. Лекин у пайтда қийин эди. “Иймон” ашуласини айтмайман деб сўз бердим, имзо қўйдим. Балки 3-4 йил саҳнага чиқмасман, аммо айтаман дегандим, анча йил чиқмай кетдим.

Ҳақиқат бор, лекин ҳақиқатни ҳимоя қилсанг бор. Рўшнолик, омон-омонлик бор, агар сен у учун курашсанг, қийматини билсанг бор. Сиз ўша пайти роса унвонлар олгансиз-ку, дейишади. Мени унвонларим билан қўшиб, қон қустиришган.

Депутатлик пайтимда фарғоналик бир депутат одам олдимда ўтирарди. “7 ойдан бери халқ ойлик олмаяпти”, деганидан кейин ўлигини ҳам, тиригини ҳам кўрмадим шу одамнинг.

Машинамда жойнамоз кўриб қолишгани учун бир ярим ой ҳисоб берганман. Дўппи кийганнинг ҳам боши балога қолган. Нечта одам етмади бугунги кунга. Нечтаси туҳматларга қолиб, Қорақалпоғистоннинг чўлидаги қамоқхонада йўқ бўлиб кетди. Намоз ўқигани учун туҳматга қолгани қанча. Бугун масжидларимизда азон ўқиляпти. Азон чақирилган юртда барокат доим бўлади. Бугун эркин нафас оляпмиз. Тўғонни бирдан очиб юборса, тошқин бўлади. Секин-секин берса, инсон озодликка ўрганади. 

Ҳаётда камчиликсиз ҳеч бир давлат йўқ. Лекин бугун эркинлигимизнинг қийматини билайлик. Мозоримиз ҳам, бозоримиз ҳам шу ерда. Шунинг учун, бу кунлар – эркинлик, одиллик бизга керак”, — деди Юлдуз Усмонова.

Халқ артисти конституциявий ислоҳoтларга бефарқ эмаслигини таъкидлаб, жамоатчиликни референдумда фаол иштирок этишга чақирди.

Тарғибот тадбирлари ҳудудларда давом этмоқда.