Қодиров Москвада масжид қурилишига қарши митинг иштирокчиларини фронтга юборишни таклиф қилди

Чеченистон раҳбари Рамзан Қодиров Москва шарқида масжид қурилишига қарши ўтказилаётган митингни «провокация» деб атади. У бу ҳақдаги хабарни телеграм-каналига жойлаштирган.

Қодировнинг фикрича, акция иштирокчилари «ғарб манфаатлари йўлида ҳаракат қилмоқда» ва «бир мамлакат фуқаролари ўртасида бўлиниш келтириб чиқариш»га ҳаракат қилмоқда.

«Агар бу митинг иштирокчилари чин юракдан ва чин дилдан рус ерларини ҳимоя қилиш ғояси билан чиққан бўлишса, унда автомат кўтариб окопларга борсин! Ҳар куни ҳимоя қилишимиз керак бўлган рус заминининг олдинги чизиқдаги бепоён кенгликларини кўз билан қамраб олиб бўлмайди. Автоматни қўлга олинг, бугун Россия Донбассида сизнинг ўрнингизга жанг қилаётган мусулмоннинг ўрнига бориб ўз ватанпарварлигингизни кўрсатинг, ватанни қанчалик севишингизни сўз ёки провокациялар ўрнига амалда намойиш этинг», деган у.

Қодиров, шунингдек, ҳар қандай вазиятни «ҳамиша дипломатик йўл билан ҳал қилиш мумкин» бўлгани ҳолда ҳозирда масжид билан боғлиқ мавзуни «қасддан ва фаол чайқатиш» бошланганини қайд этган.

• Москва шарқидаги Косино-Ухтомский райони аҳолиси феврал ойи бошларидан уларнинг районида масжид қурилишига қаршилигини билдириб «прогулка»га чиқа бошлади. Уларнинг сўзларига кўра, улар транспорт коллапси, мигрантлар оқими ва жиноятчилик ўсишидан хавотирда. Шунингдек, аҳолига масжид проваславлар ибодатхонаси рўпарасига қурилиши ёқмаяпти.
• Москва ҳукумати ушбу ҳудуддаги қарийб 10 гектар ер майдони «диний маънавий-маърифий марказ» қуриш учун ижарага олинганини расман тасдиқлаган. Шу билан бирга объект паспортида қурилиш бўлаётган майдонда «транспорт-пересадка узели» қурилиши кўрсатилган.