Арманистон ва Озарбойжон бир-бирини отишмада айблади

Арманистон ва Озарбойжон бир-бирини ўз ҳудудларини ўққа тутишда айблади. 11 май, пайшанба куни Арманистон Мудофаа вазирлиги Озарбойжон қўшинлари Арманистон шарқидаги Сотк аҳоли пункти йўналишидаги арман позицияларини артиллерия ва миномётлардан ўққа тутгани, натижада икки арман аскари яралангани ҳақида хабар берди.

Хабарда қайд этилишича, “Арманистон қуролли кучлари бўлинмалари тегишли мудофаа чораларини кўрмоқда”. Арманистон Мудофаа вазирлиги, шунингдек, Озарбойжон мудофаа вазирлигининг арман аскарлари отишма бошлагани, натижада бир озарбойжонлик аскар яралангани ҳақидаги хабарини дезинформация деб атади.

Ўз навбатида, Озарбойжон Мудофаа вазирлиги арман қўшинларини сулҳни бузганликда ва қасддан провокацияда айблади. "Арманистон Қуролли кучлари бўлинмалари Басаркечяр вилоятининг Зод йўналишидаги позицияларидан Озарбойжон армиясини турли ўқотар қуролларидан интенсив ўққа тутди. Душман томонидан нишонга олинган ўқлар натижасида озарбойжонлик ҳарбий хизматчи оғир яраланган”, — дейилади Озарбойжон ҳарбий идораси баёнотида.

Хабарда, шунингдек, Озарбойжон ҳудудини ўққа тутиш давом этаётгани, “Арманистон Қуролли кучлари йирик калибрли қурол ва миномётлардан фаол фойдаланаётгани” айтилган.

Шу билан бирга, Озарбойжоннинг ҳарбий янгиликларга ихтисослашган Caliber нашри Арманистон чегарадаги Озарбойжон позицияларига зарба бериш учун камикадзе дронлардан фаол фойдаланаётганини ёзмоқда. Дронлар Эронда ишлаб чиқарилган бўлиши мумкин бўлган, камида бешта кучли портлаш қайд этилган.

Икки собиқ совет республикаси - Арманистон ва Озарбойжон - асосан этник арманлар яшайдиган Озарбойжоннинг Тоғли Қорабоғини назорат қилиш учун ўнлаб йиллар давомида курашиб келади.

Озарбойжон ва Арманистон президентлари Илҳом Алиев ва Никол Пашинян 14 май, якшанба куни Брюсселда можарони тартибга солишга эришиш учун уч томонлама учрашув ўтказади.