Дам олиш кунлари Европада миллий чемпионатлар тўлиқ якунига етиб, кубок баҳсларида финаллар ўтказилади. Англия ва Германияда кубок эгалари маълум бўлса, Италия ва Испанияда лигада қолиш учун кураш кечади, Францияда эса Месси «ПСЖ» билан хайрлашади. Якшанба оқшомида «Рома» Элдор Шомуродовнинг амалдаги жамоасини қуйи лигага равона қилиши ёки «Специя» Рим клубини Европа лигаси йўлланмасидан маҳрум этиши мумкин.
Англия кубоги. Финал
3 июнь (шанба)
МАНЧЕСТЕР СИТИ – МАНЧЕСТЕР ЮНАЙТЕД
Ўйин бошланиш вақти: 19:00
Англияда якунига етаётган мавсум Манчестер клубларига аталди, дейиш мумкин. «Сити» Премьер-лига ғолиблигини қўлга киритди, «Юнайтед» Англия лига кубоги эгасига айланди. Футболдаги энг тарихий ва жамоалар сони бўйича йирик турнир саналмиш Англия кубоги соврини ҳам юқоридаги икки клубдан бирига насиб этади. Гвардиола шогирдлари мавсумдаги сўнгги икки ўйин эвазига требл қилиш имкониятига эга, «Юнайтед» эса мавсумдаги иккинчи совринини қўлга киритибгина Англияда фақат ўзига тегишли бўлган треблни ҳамшаҳри томонидан ҳам қайд этилишига тўсқинлик қилиши мумкин.
Англия кубоги финалида илк марта ўзаро тўқнаш келаётган «Сити» ва «Юнайтед» ўртасидаги баҳс олдидан кўпчилик «шаҳарликлар»нинг устунлигини қайд этаётган бўлса-да, Эрик тен Ҳаг жамоаси ўзи учун мавсумдаги сўнгги ўйинга майдонга жангга чиққандек ҳаракат қилиши аниқ. Гвардиола шогирдлари эса бир ҳафтадан кейин Чемпионлар лигаси финали кутиб турганини англаган ҳолда эҳтиёткор тўп суришга мажбур. Жамоаларнинг ўзаро сўнгги ўйинида «МЮ» Фернандеш ва Рэшфорднинг голи эвазига «Сити»дан устун (2:1) келгани ҳам «қизил иблислар»га руҳий устунлик бериши мумкин.
Финалда «Сити» таркибида Кевин Де Брюйне ва Жек Грилишнинг майдонга тушиши сўроқ остида. Гвардиола «Сити» учун бош мақсад бўлган ЕЧЛ финали олдидан бу ўйинчиларнинг соғлиғи билан таваккал қилмаслиги мумкин. Пеп финалда Эдерсон ўрнига турнир давомида ажойиб ҳаракат қилиб келган Штефан Ортега дарвозани қўриқлашини маълум қилган. Тен Ҳаг эса Марсьяль, Лисандро Мартинес, ван де Бек хизматидан фойдалана олмайди. Антонининг сафга қайтиши эса сўроқ остида.
Германия кубоги. Финал
3 июнь (шанба)
ЛЕЙПЦИГ – АЙНТРАХТ
Ўйин бошланиш вақти: 23:00
Германия кубогининг ҳали қилувчи ўйинигача «Бавария» ҳам, «Боруссия» ҳам етиб кела олмади. Турнирнинг амалдаги ғолиби «Лейпциг» Берлинда «Айнтрахт»га қарши майдонга тушади. Бундеслигада 3 ва 5-ўринни эгаллаган жамоалар ўртасидаги учрашув шиддатли ўтишини кутиш мумкин.
Франция чемпионати. 38-тур
3 июнь (шанба)
ПСЖ – КЛЕРМОН
Ўйин бошланиш вақти: 23:59
Франция чемпионатида ЕЧЛга йўлланма олганлар ва қуйи лигага тушиб кетадиган жамоалар номи деярли маълум бўлди. Сўнгги турда эса бу чемпионат турнирнинг сўнгги икки йилдаги асосий юлдузи бўлган, Франция 1-лигасига янада каттароқ аудитория қўшилишига сабаб бўлган Лионель Месси билан хайрлашади. «ПСЖ» муддатдан аввал чемпионликни қўлга киритди ва «Клермон»га қарши кечадиган мавсумнинг сўнгги ўйинида барчанинг нигоҳи Мессига қаратилади. Ўйин олдидан парижликлар бош мураббийи Кристоф Гальтье парижлик мухлислардан аргентиналик футбол юлдузи билан чиройли хайрлашишни сўраб, футболчилар ҳам Мессининг хайрлашув ўйини яхши ўтишини таъминлашлари кераклиги ҳақида гапирди. Лионель ҳам икки йиллик фаолияти ўтган клубдаги ишини муносиб якунлашга интилиши аниқ.
Италия А Серияси. 38-тур
4 июнь (якшанба)
РОМА – CПЕЦИЯ
Ўйин бошланиш вақти: 23:59
«Рома» чоршанба оқшомида Европа лигаси финалида «Севилья»га мағлубиятга учраб, Чемпионлар лигасига йўлланма олиш учун сўнгги имкониятни ҳам қўлдан чиқарди. Энди эса Жозе Моуриньо шогирдлари А Серия сўнгги турида «Специя»га қарши баҳсда Европа лигаси йўлланмаси учун курашишади. А Серияда кетма-кет сўнгги 7 ўйиндан буён ғалаба қозона олмаётган Рим клуби Элдор Шомуродов тўп сураётган жамоага қарши баҳсда ҳам очко йўқотса ва «Ювентус» «Удинезе»ни мағлуб этса, «Рома» яна бир поғона пастлаб, 7-ўрин билан кейинги мавсумда ҳам УЕФА Конференциялар лигасига тўп суришига тўғри келади.
«Специя»нинг тақдири ҳам ушбу баҳсга боғлиқ. Шомуродов майдонга тушган тақдирда ушбу жамоадаги сўнгги ўйини бўладиган баҳсда «Специя» А Серияда қолиши ёки лигадан тушиб кетиши мумкин. Тур олдидан «Специя» 31 очко ва тўплар нисбатига кўра 17-ўринни эгаллаб турибди, 18-ўриндаги «Верона»да ҳам 31 очко мавжуд. Специяликлар Римда очко йўқотса, Миландаги параллель ўйиндаги натижани кутишга мажбур бўлади.
4 июнь (якшанба)
МИЛАН – ВЕРОНА
Ўйин бошланиш вақти: 23:59
«Сан-Сиро»даги ўйин «Милан»дан ҳам кўра, «Верона» учун ҳаёт-мамот масаласи ҳисобланади. «Россонерлар» Чемпионлар лигасидаги йўлланмани нақд қилишди, ғалаба эса уларга бронза медалини келтириши мумкин. Аммо бунинг учун улар ЕЧЛ финалига тайёргарлик кўраётган «Интер»нинг «Торино»га мағлубиятини кутишига тўғри келади. Акс ҳолда «Милан»нинг (67 очко) «Интер»дан (69 очко) ўзиб кетиш имкони бўлмайди.
«Верона» эса турнир жадвалида 18-ўринда бўлиб, B Серияга тушиб кетиш арафасида. Вероналиклар «Специя»нинг Римда очко йўқотишини кутиб, Миланда сенсацион натижа қайд этишига тўғри келади. Акс ҳолда жамоа қуйи лигага равона бўлади.
Испания: Ла Лигада элитада қолиш учун кураш авжида
Ла Лига сўнгги туридан олдин чемпион ва еврокубокларга йўлланма олган жамоалар номи маълум бўлиб улгурган. Интрига фақат турнир жадвалининг қуйи қисмида қолган – бирйўла 6 жамоа Сегундага тушиш хавфи остида турибди. «Эльче» ва «Эспаньол» қуйи лигага равона бўлди, яна бир омадсиз чипта соҳиби сўнгги турдан кейин маълум бўлади.
18-ўриндаги «Вальядолид» ҳисобида 39 очко мавжуд, «Сельта» (40), «Альмерия» (40), «Валенсия» (41), «Хетафе» (41) ва «Кадис» (41) ҳам ҳали лигадаги ўрнини кафолатламаган.
4 июнь (якшанба)
Вальядолид – Хетафе
Эльче – Кадис
Эспаньол – Альмерия
Сельта – Барселона
Бетис – Валенсия
Ўйинлар бошланиши вақти: 23:59.
