Наманганда Шимолий Фарғона каналига тушиб кетган 2та "Дамас" олиб чиқилди

ФВВ қутқарувчилари Шимолий Фарғона каналига тушиб кетган 2та "Дамас" автомобилини олиб чиқди.

Фото: ФВВ

Бугун, 22 июль куни соат 12:50да ФВБга Наманган вилояти Наманган шаҳар “Ғунча” МФЙ ҳудудидан оқиб ўтувчи Шимолий Фарғона каналига “Дамас” русумли автомобиль тушиб кетгани тўғрисида хабар келиб тушган.

Воқеа жойига Наманган вилояти ФВБ қутқарув отряди ходимлари етиб бориб, махсус техника ёрдамида каналдан автомобилни олиб чиқаётган вақтда яна бир "Дамас" автомобили ҳайдовчиси бошқарувни йўқотиб, ушбу каналга тушиб кетган.

Биринчи автомобиль салонида йўловчилар бўлмаган. Иккинчи автомобиль салонида 5 нафар йўловчи бўлган.

ФВВ қутқарувчилари иккинчи автомобиль салонидан йўловчиларни қутқариб, ҳаётини сақлаб қолган. Бир нафар фуқаро шифохонага ётқизилган. Ҳозирда унинг аҳволи яхши экани айтилади.

Ҳодиса оқибатида ҳалок бўлганлар йўқ. Ҳолат юзасидан прокуратура томонидан терговга қадар текширув ҳаракатлари олиб борилмоқда.

#канал #Шимолий Фарғона