АҚШ Молия вазирлиги маълумотларига кўра, жазоланган шахслар Серб Республикаси Халқ ассамблеяси томонидан Дейтон тинчлик келишуви ижросини хавф остига қўядиган қонун қабул қилинишига ёрдам бергани учун жавобгардир.
АҚШ Молия вазирлигининг Хорижий активларни назорат қилиш бошқармаси (OFAC) Босния ва Ҳерцеговинадан (БвҲ) бир давлат даражасидаги амалдорга ва БвҲдаги Серб Республикасидан (СР) уч нафар амалдорга санкция қўйди. Бу ҳақда 31 июль, душанба куни АҚШ Молия вазирлиги маълум қилди.
Унга кўра, бу шахслар Серб Республикаси Миллий ассамблеяси томонидан БвҲ Конституциявий суди қарорларини СР ҳудудида қўлланилмайди, деб эълон қилишга мўлжалланган қонун қабул қилинишига кўмаклашиш ва шу билан Дейтон тинчлик келишуви ижросини хавф остига қўйиш учун жавобгардир.
Серб Республикаси Миллий ассамблеяси раиси Ненад Стевандич, Серб Республикаси бош вазири Радован Вишкович, БвҲ президиуми аъзоси Желька Цвиянович ва Серб Республикаси адлия вазири Милош Букейловичга нисбатан чеклов чоралари қўлланган.
Уларнинг «ҳаракатлари Босния ва Ҳерцеговинанинг барқарорлиги, суверенитети ва ҳудудий яхлитлигига, шунингдек, Дейтон тинчлик келишуви асосида қийинчилик билан эришилган тинчликка таҳдид солади», деди терроризмга қарши кураш ва молиявий разведка хизматларини назорат қилувчи АҚШ молия вазири ўринбосари Брайен Нелсон. Унинг сўзларига кўра, бу хатти-ҳаракатлар БвҲнинг «Евроатлантика институтларига» муваффақиятли интеграциялашувини хавф остига қўяди.
