Африка Иттифоқи Нью-Деҳлидаги G20 саммитининг очилишида «катта йигирматалик» аъзолигига таклиф қилинди. Унга аъзо бўлиш G20’да глобал Жанубнинг ролини кучайтиради.
Африка Иттифоқи (АИ) G20’га қўшилди. Бу ҳақда Ҳиндистон бош вазири Нарендра Моди 9 сентябр, шанба куни эрталаб Нью-Деҳлида G20 саммитининг очилишида айтиб ўтди. «Сизнинг розилигингиз билан мен Африка Иттифоқи раисини G20 тўлақонли аъзоси сифатидаги ўрнини эгаллашга таклиф қилмоқчиман», деди Моди. Шундан сўнг, АИ раҳбари, Комор ороллари президенти Азали Ассоумани Ҳиндистон бош вазирига яқинлашган.
Африка Иттифоқининг G20’га аъзо бўлиши глобал Жанубнинг G20’даги ролини кучайтиради. Ҳозиргача унинг таркибига киритилган ягона минтақавий ташкилот Европа Иттифоқи бўлиб, унга 27 давлат аъзо ҳисобланади.
Африка Иттифоқига суверенитети халқаро миқёсда тан олинган 54 Африка давлати, шунингдек, давлатлиги баҳсли Ғарбий Саҳро киради. Шундай қилиб, АИ 1,3 миллиард кишининг манфаатларини ифодалайди.
Европа Иттифоқининг Африка Иттифоқи G20’га қўшилишига муносабати
Европа Кенгаши раҳбари Шарл Мишел ва Европа комиссияси раиси Урсула фон дер Ляйен Африка Иттифоқини G20 аъзолигига қабул қилиш қарорини олқишлади. «Биз Африка Иттифоқини G20 аъзоси сифатида кутиб олишдан мамнунмиз», деди фон дер Ляйен бу борада.
Нью-Деҳлида очилган G20 саммитида Россиядан ташқи ишлар вазири Сергей Лавров иштирок этмоқда. Россия президенти Владимир Путин учун Халқаро жиноий суд (ХЖС) томонидан чиқарилган ҳибсга олиш ордери туфайли хорижга сафар қилиш ҳозирда мураккаб масала.
Украинадаги уруш фонида саммит якунида унинг иштирокчиларининг қўшма баёноти қабул қилинадими-йўқми, ноаниқлигича қолмоқда. Учрашув олдидан Урсула фон дер Ляйен ARD ва ZDF телеканалларида бундай баёнот бериш шартларини эълон қилди. «Асосий тамойилларга амал қилиш муҳим», - дея таъкидлади у ва бундай тамойиллар, хусусан, чегаралар дахлсизлиги, шунингдек, қўшиб олинган ҳудудларни тан олмасликни ўз ичига олишини тушунтирди.
Ҳозирда G20’га раислик қилаётган Ҳиндистон ва G20 аъзоси бўлган Хитой Россиянинг Украинадаги ҳарбий ҳаракатларини қораловчи аниқ баёнотлар бермади.
