Сурхондарё ва Бухорода пул эвазига “права” олиб бермоқчи бўлган шахслар қўлга олинди

Бош прокуратура ҳузуридаги департаментнинг ҳудудий бўлимлари ҳамда ҳуқуқни ҳимоя қилиш органлари томонидан Сурхондарё ва Бухоро вилоятларида пул эвазига ҳайдовчилик гувоҳномаси олиб бермоқчи бўлган шахслар қўлга олинган. 

Жумладан, департамент ҳамда ДХХнинг Когон тумани бўлимлари томонидан ўтказилган тезкор тадбирда фуқаро Б.И. бошқа бир фуқаро М.М.дан уни гўёки вилоят ЙҲХБда ишловчи танишлари орқали ҳайдовчилик гувоҳномаси олиш учун бўлиб ўтадиган имтиҳондан ўтказиб қўйиш эвазига 750 АҚШ доллари олган вақтида ашёвий далиллар билан ушланган.

Шунингдек, департаментнинг Термиз шаҳар бўлими томонидан ИИБ ходимлари билан ҳамкорликда ўтказилган тезкор тадбирда фуқаро Ш.А. фуқаро Х.Ж.га танишлари ёрдамида “С” тоифали ҳайдовчилик гувоҳномаси олиб беришни ваъда қилиб, ундан “хизмати” эвазига 4,7 млн сўм олаётганда қўлга тушган.

Юқоридаги ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.