Ўзбекистондан Россияга янги мултимодал йўналишда юк ташувлари йўлга қўйилиши мумкин

12 сентябр куни транспорт вазири Илҳом Маҳкамов Россия Федерацияси транспорт вазири ўринбосари Дмитрий Зверев билан учрашув ўтказди. 

Транспорт вазирлиги хабарига кўра, учрашувда транспорт ва логистика соҳасидаги икки томонлама ҳамкорлик масалалари муҳокама қилинди.

Жумладан, халқаро автомобил ташувлари учун рухсатнома бланкалари сонини кўпайтириш, икки давлат шаҳарлари ўртасидаги рейслар частотасини ошириш ва Тошкент - Жанубий-Сахалинск янги йўналишини очиш масаласи кўриб чиқилди.

Бундан ташқари, мамлакатлар ўртасида Ўзбекистон – Туркманистон – Каспий денгизи – Россия мултимодал йўналишида экспорт-импорт юк ташувларини ташкил этиш ҳамда ҳамкорликнинг бошқа масалалари юзасидан фикр алмашилди.