Бу жойда охирги марта таъмирлаш ишлари 2000-йилларда амалга оширилган.
«Тошкент» аэропортида самолётлар тўхташ жойларини капитал таъмирлаш ишлари бошлангани маълум қилинди.
Қайд этилишича, Тошкент аэропортининг аеродром мажмуасини таъмирлаш ишлари давом этмоқда. Хусусан, B1-B5 ва B11-B17 самолёт турар жойларини, шунингдек, РД-Б юриш йўлини капитал таъмирлаш ишлари бошланди. Капитал таъмирлаш доирасида сунъий қоплама мустаҳкамланади.
«Бу жойда охирги марта таъмирлаш ишлари 2000-йилларда амалга оширилган. Фойдаланиш муддати узоқ бўлганлиги сабабли таъмирлашни талаб қилувчи нуқсонли жойлар шаклланган», — дея изоҳ берилди Uzbekistan Airports компаниясининг парвозларга аэродромда техник таъминот кўрсатиш бўлимида.
Таъмирланаётган асфалт ва бетон аралашмасининг умумий майдони 92 минг квадрат метрни ташкил қилади.