26 ва 27 октябр кунлари Брюсселда бўлиб ўтадиган Европа Иттифоқи давлат ва ҳукумат раҳбарларининг йиғилишида Россияга қарши янги санкциялар пакети кўриб чиқилади, деди 25 октябр, чоршанба куни саммит олдидан DW нашрига Европа Иттифоқининг юқори мартабали расмийси. Бундан ташқари, Европа Иттифоқи 2024 йил бошигача жорий этилиши кутилаётган G7 давлатлари даражасида Россия олмосларига эмбаргони муҳокама қилиши кутилмоқда.
Европа Иттифоқининг ўн иккинчи пакети нафақат рус олмосларига, балки алюминийга қарши санкцияларни, шунингдек, икки томонлама мақсадларда ишлатиладиган товарларни етказиб беришга қўшимча чекловларни ўз ичига олиши керак, деди расмий. Унинг қайд этишича, Европа Иттифоқи Россия қуроллари ва ўқ-дориларида топилган компонентларни аниқлаш масаласида Украина билан яқиндан ҳамкорлик қилмоқда. «Бу ақл бовар қилмайдиган нарса, лекин уларда ҳатто музлатгич чиплари ҳам топилди», деди DW нашрига юқори мартабали амалдор.
Бундан ташқари, янги жазолар пакетининг муҳим қисми уларни четлаб ўтишнинг олдини олиш механизми бўлади, дейди Брюсселдагилар.
Украинани қўллаб-қувватлаш устувор вазифадир
Европа Иттифоқи расмийларининг ишонтиришича, Яқин Шарқдаги можаро авж олганига қарамай, Украина устувор вазифа бўлиб қолмоқда. Шу тариқа, 26-27 октябр кунлари етакчилар Европа Иттифоқининг 2024-2027 йилларга мўлжалланган узоқ муддатли бюджети ва унга Украина учун киритилган 50 миллиард евролик ёрдам жамғармаси ҳамда унинг тузилмасини муҳокама қилади. Хусусан, Германия кўпроқ грантлар улушини ва кичикроқ кредитларни қўллаб-қувватлайди. Акс ҳолда, Украинанинг катта давлат қарзи уруш тугаганидан кейин унинг учун салбий оқибатларга олиб келади ва Халқаро валюта жамғармаси билан муносабатларини мураккаблаштиради, дея башорат қилмоқда Германия ҳукумати.
Брюсселда Россиянинг музлатилган активларидан фойдаланишнинг қонуний йўллари бўйича муҳокамалар давом этмоқда. ЕИ давлатларидан бирининг дипломатига кўра, бу борадаги таклифларнинг ҳеч бири ҳали кенгашда етарлича қўллаб-қувватланмади, шунинг учун кейинги мунозаралардан сўнг, жумладан, ЕИ саммитида Европа комиссияси ёки Европа Иттифоқи ташқи сиёсат хизмати томонидан ҳам таклиф тақдим этилиши кутилмоқда. Умуман олганда, дипломатларнинг фикрича, халқаро ҳамжамият ва G7 даражасида ечим топиш зарурлиги ва эртами-кечми ечим топилиши ҳақида умумий тушунча мавжуд.
Украинага ҳарбий ёрдам давом этади
