Исроил 7 октябрдаги ҳужумни тайёрлаган ҲАМАС вакили ўлдирилганини эълон қилди

Шоди Баруд қирувчи самолётларнинг ҳаво ҳужуми оқибатида ҳалок бўлган.

Фото: Getty Images

Фаластиннинг ҲАМАС ташкилоти разведка бошқармаси бошлиғи ўринбосари Шоди Баруд Ғазо секторида ўлдирилди. Бу ҳақда Исроил мудофаа армияси (ЦАХАЛ) хабар берди. Баруд 7 октябр куни Исроилга қилинган ҳужумни режалаштириш учун масъул шахслардан бири бўлгани айтилмоқда.

«Исроил мудофаа кучлари Яҳё Синвар (ҲАМАС ҳаракатининг амалдаги раҳбари) билан биргаликда Исроилга қилинган ҳужумни режалаштирган ҲАМАС разведка бошқармаси бошлиғи ўринбосарини ўлдирди», дейилади хабарда.

ЦАХАЛ маълумотларига кўра, Баруд қирувчи самолётларнинг ҳаво ҳужуми оқибатида ҳалок бўлган. У ўтмишда ҲАМАС баталйони қўмондони бўлиб хизмат қилган ва исроилликларга қарши қатор ҳужумларни режалаштиришда иштирок этган.

Ҳозирча Фаластиннинг ҲАМАС ҳаракати Баруд ўлимини тасдиқламади.

Аввалроқ, Исроил армияси ҲАМАС ҳаракатига алоқадор ҳарбий-ҳаво кучлари бўлинмаларининг беш нафар қўмондони ўлдирилганини эълон қилган эди. 7 октябр куни Исроилга уюштирилган ҳужумда уларнинг ҳам «муҳим рол» ўйнагани қайд этилди.

#Исроил #Ҳамас #ЦАХАЛ

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.