Украина президенти Володимир Зеленский Associated Press агентлигига берган интервюсида Россия билан уруш янги босқичга ўтганини айтган ва мамлакат қуролли кучлари ёзги қарши ҳужум пайтида кутилган натижаларга эриша олмаганини тан олган.
«Бизда урушнинг янги босқичи ва бу факт, — деган Зеленский AP мухбирига Харкивга сафари чоғида. — Қиш келиши ўз ўзидан — урушнинг янги босқичи».
Агентликнинг ёзишича, қиш бошланиши билан украин қўмондонлиги янги, лекин таниш бўлган муаммоларни кутмоқда: ҳарорат пасайиши, ҳарбийларга яшириниш учун умуман жой бўлмаган яйдоқ далалар.
Яна украин шаҳарларидаги энергетика инфратузилмаларига Россиянинг кенг кўламли ҳужумлари таҳдиди юзага келган. Зеленский қишда ҳарбий ҳаракатлар нафақат фронт чизиғида, балки шаҳарлар ичкарисида ҳам олиб борилишини таъкидлаган.
Бу вақтда эса ўқ-дорилар тугаб бормоқда ва бу украин ҳарбийларининг ҳарбий амалиётларини фалажлаб қўйиши мумкин.
Узоқ кутилган, Ғарбнинг ўнлаб миллиард долларлик ҳарбий ёрдами етказилганидан кейин бошланган қарши ҳужум кутилган ютуқларга олиб келмади, дея эслатади AP. Энди украиналик айрим мулозимлар келгусида ҳам шундай сахий ёрдамлар бўлмаслигидан хавотирланмоқда.
Қарши ҳужум натижалари қанчалик қониқарли бўлгани ҳақидаги саволга жавобан Зеленский шундай деган: «Қаранг, биз чекинмаяпмиз — бу мени қониқтиради. Биз дунёнинг иккинчи армиясига қарши жанг қиляпмиз, бунисидан кўнглим тўқ». Ва қўшимча қилган: «Биз одамларни йўқотяпмиз, буниси қониқарли эмас. Биз ўзимиз истаган барча қуролларни олмадик, албатта қониқмайман. Лекин ортиқча шикоят ҳам қила олмайман».
«Биз янада тезроқ натижаларга эришишни истагандик. Бу нуқтайи назардан, афсуски, биз исталган натижага эриша олмадик. Ва бу факт», — деган Зеленский.
Ғарблик ҳарбий таҳлилчиларга кўра, Украина қуролли кучлари ёзги қарши ҳужум давомида Азов денгизи соҳилига чиқишни (ёки унга имкон қадар яқинлашишни), бу орқали Россиянинг аннексия қилинган Қримга қуруқлик йўлагини тўсиб қўйишни ҳамда Днипро дарёсининг сўл соҳилида оккупация қилинган ҳудудларда турган Россия гуруҳларини таъминотдан узишни мақсад қилганди.
Украина қуролли кучларининг асосий зарбаси Запорижжя областида берилди ва стратегик жиҳатдан муҳим шаҳар Токмакка чиқиш режалаштирилди. Аммо бу юришнинг илк босқичидаёқ украин қўшини Россия мудофаасининг яхши миналаштирилган ва мустаҳкамланган илк чизиғига тўқнаш келди. Натижада Украина ҚК кичик гуруҳлар билан ҳужумлар уюштириш тактикасига ўтди ва бу ҳозирча фақат кичик ютуқлар билан чекланмоқда.
