Россия қўшини 2 январга ўтар кечаси Украина бўйлаб ёпирилма зарба берди.
1 январ куни кечқурун ва тун мобайнида россиялик ҳарбийлар Shahed-136/131 типидаги 35 та зарбдор дронлар билан зарба йўллаган, дея маълум қилди Украина ҚК ҳаво кучлари. Маълум қилинишича, барча дронлар уриб туширилган. Шунингдек РФ қўшини бир қанча ракета зарбалари амалга оширган: Ту-95МС бомбардимончилари ва МиГ-31К қирувчилари («Кинжал» ракеталари ташувчиси) орқали зарбалар йўллангани хабар қилинган. Украина ҳаво кучлари РФ қўшини «Кинжал»ларни Киев йўналишида учирилганини маълум қилган. Украина омбудсмени Дмитро Лубинецга кўра, Россия Украина бўйлаб 10 дан ортиқ «Кинжал» ракеталари учирган. Бутун Украина бўйлаб ҳаво тревогаси эълон қилинган. Украина регионларида ҳаво ҳужумидан мудофаа кучлари ишлаган.
Украина президенти Володимир Зеленский маълум қилишича, ёпирилма зарбалар натижасида, маҳаллий вақт билан соат 10:51 ҳолатига (Тошкент вақти билан 13:51), тўрт киши ҳалок бўлган ва 92 киши яраланган. Зеленский Россия қўшини Украинадаги фуқаролик объектларига ҳужум қилганини таъкидлаган. «Учинчи кундирки ҳаво ҳужумидан мудофаа кучларимиз жангчилари ақл бовар қилмас иш олиб боришмоқда. 31 декабрдан буён россиялик ярамаслар 170 га яқин „шаҳидлар“ ва ўнлаб турли типдаги ракеталарни учиришди. Уларнинг мутлақо кўпчилик қисми фуқаролик объектларига йўналтирилган», — деган Украина президенти.
Украина қуролли кучлари бош қўмондони Валерий Залужний хабар қилишича, Россия қўшини Украинага қилинган ҳужумда турли типдаги 99 та ракетадан фойдаланган. Унинг сўзларига кўра, Ту-95МС русумли 16 та бомбардимончи самолётлар Х-101/Х-555/Х-55 русумли камида 70 та қанотли ракеталар учирган. МиГ-31К қирувчилари Х-47М2 «Кинжал» русумли ўнлаб аэробаллистик ракеталар билан зарба йўллаган. Бундан ташқари, РФ қўшини «Калибр» ракеталари, баллистик ракеталар, шунингдек Х-31П русумли радиолокацияга қарши ракеталар учирган. Залужнийнинг тасдиқлашича, мамлакат ҳаво ҳужумидан мудофаа кучлари 72 та ракетани йўқ қилган: 10 та «Кинжал»дан 10 таси, 70 та Х-101/Х-555/Х-55 русумли қанотли ракеталардан 59 тасини, шунингдек «Калибр» русумли учта қанотли ракетанинг барчасини уриб туширган.
Киев
Киев шаҳри ҳарбий маъмурияти раҳбари Сергей Попко хабар қилишича, Россия қўшини ҳаводан қўлланадиган қуроллари арсеналининг катта қисмидан фойдаланган. РФ қўшини аввалига Киевга тахминан 15 та Shahed дронлари билан ҳужум қилган, кейин Ту-95МС бомбардимончилари Х-101/Х555Х-55 қанотли ракеталари тўлқинини юборган, МиГ-31К самолётлари эса Киевга Х-47М2 «Кинжал» ракеталарини учирган. Попконинг сўзларига кўра, ҳаво ҳужумидан мудофаа кучлари барча дронларни, 60 дан ортиқ Х-101/Х555Х-55 русумли ракеталар ҳамда «ўнлаб» «Кинжал» ракеталарини уриб туширган.
Мавзуга оид
Киевнинг Деснянский районида очиқ майдонга учувчисиз учар қурилма парчалари тушган, дея хабар берган шаҳар мэри Виталий Кличко. Унинг аниқлик киритишича, бу ҳудудда супермаркетда ёнғин чиққан.
Соломенский районида ракета ҳужуми оқибатида кўп қаватли турар жой биносининг икки қаватида ёнғин рўй берган, дейилади Сергей Попконинг хабарида. Унинг сўзларига кўра, ёнғин туфайли одамлар ўз қаватларида қамалиб қолган. Уй яқинида вақтинча исиниш маркази ташкил этилган ва бу ерда одамларга зарур ёрдамлар кўрсатилмоқда.
Украина расмийларининг сўнгги маълумотларига кўра, Киевга зарбалар оқибатида икки киши ҳалок бўлиб, 49 киши жароҳат олган. Уларнинг барчаси Киевнинг Соломенск районига ракета зарбаси оқибатида жароҳатланган. Жабрланганларнинг кўпчилиги шифохонага ётқизилган.
Киевда зарбалардан жиддий шикастланган кўп қаватли уй ҳудудидаги қутқарувчилар
Valentyn Ogirenko / Reuters / Scanpix / LETA
Зарба оқибатида жиддий шикастланган кўп қаватли уй ҳудудидан тинч аҳоли вакилларини олиб чиқаётган қутқарувчила
Valentyn Ogirenko / Reuters / Scanpix / LETA
Valentyn Ogirenko / Reuters / Scanpix / LET
Печерский районида ракета парчалари тўққиз қаватли уй томига ва яна бир кўп квартирали уй устига қулаган. Голосеевский районида парчалар хиёбон ҳудудига, Оболонский районида — аҳоли яшамайдиган қурилишларга тушган.
Подолск районида газ қувури, фуқаролик инфратузилмаси (айнан қандай объектлиги аниқ эмас), сув узатиш қувури шикастланган. У ерда икки минг квадрат метр майдонни эгаллаган омборхонада, бозор ва турар жойлар ҳудудида ёнғинлар рўй берган. Оболонский районида ҳам парчалар омбор ҳудудига тушган. Кличконинг хабар қилишича, Святошинский районида ижтимоий инфраструктура объектга зарба берилган. Дарницкий районида хусусий уйлар ва черков биноси шикастланган. Украин нашрлари Tesla автосалонида ёнғин рўй берганини хабар қилган, аммо бу маълумот ҳозирча тасдиқланмаган.
Киевнинг айрим районларида ичимлик суви таъминотида муаммо юзага келган, деб хабар беради Кличко. Шевченково, Святошинский, Голосеевский ва Оболон районларида электр узилиши кузатилмоқда. Шунингдек, Киев областининг Бучанск ва Вишгород районларида ҳам ток йўқ.
Киев ўққа тутилиши оқибатида 259 минг истеъмолчи электрсиз қолган, дея хабар беради Украина энергетика вазирлиги. Вазирликка кўра, Киевда ҳаво линияси шикастланиши оқибатида қатор нимстанциялар кучланишсиз қолган.
Efrem Lukatsky / AP / Scanpix / LETA
Киев области
Киев областида, Украина ИИВ маълумотига кўра, Бориспол, Бучанск ва Фастовск районлари жабрланган. Турар жойлар ва 60 дан ортиқ автомобиллар шикастланган. Вишневе шаҳрида бешта кўп квартирали уйлар, бошқа районларда — хусусий уйлар шикастланган.
Сўнгги маълумотларга кўра, Киев областида икки киши ҳалок бўлиб, 11 киши жароҳатланган, улар орасида бир бола ҳам бор.
Регионда отишмалар оқибатида юқори волтли линиялар, шунингдек нимстанциялар ускуналари шикастланган. Бундан ташқари, ГЭС фаолиятида вақтинча узилишлар юзага келган.
Харкив
Россия қўшини Харкив марказига маҳаллий вақт билан 2 январ куни соат 7:30 атрофида зарба берди, деб хабар беради Харкив области ҳарбий маъмурияти раҳбари Олег Синегубов. Унинг айтишича, Россия Харкивга «Кинжал» ракеталари, шунингдек С-300 комплексидан учирилган зенит ракеталари билан ҳужум қилган.
Хусусан, зарбалар Шевченково райони бўйлаб берилган, полиция маълумотига кўра, бу ерда тўртта нуқтага зарба келиб тушган. Расмийларга кўра, кўп квартирали турар жойлар, хўжалик бинолари, бошқа фуқаролик инфратузилмалари шикастланган, ёнғинлар келиб чиққан. Шунингдек, бир қанча автомобиллар ёниб кетган.
Расмийларнинг сўнгги маълумотларига кўра, Харкивда ракета зарбаси оқибатида маҳаллий аҳоли вакилларидан 91 ёшли аёл ҳалок бўлган, 45 киши жароҳатланган, улар орасида беш нафар бола ҳам бор.
Украинанинг қолган ҳудудлари
Кировоград областининг Кропивницкий шаҳрида ҳам портлашлар кузатилган, деб хабар берган «Суспилне» телеканали. Ҳужум оқибатлари ҳақида ҳозирча маълумот берилмаган. Кропивницкий районида ракета уриб туширилган, унинг парчалари уйлардан бирининг ҳовлисига тушган. Регион раҳбари Андрей Райковичга кўра, жабрланганлар йўқ.
Украин нашрлари Сумида портлаш бўлганини ёзишган, унинг сабаби ҳозирча маълум эмас.
Россиянинг реакцияси
РФ мудофаа вазирлиги хабар беришича, мамлакат қуролли кучлари катта масофага ҳаракатланувчи «юқори аниқликдаги қуроллар» ва дронлар билан Украина ҳарбий-саноат комплекси корхоналари бўйлаб гуруҳли зарбалар йўллаган.
Киев шаҳри ва областида зарбалар ракеталар ва дронлар ишлаб чиқариш ҳамда ҳарбий техникаларни таъмирлаш бўйича буюртмаларни бажараётган корхоналар бўйлаб йўлланган, дейилади РФ мудофаа вазирлиги хабарида. Шунингдек, ракеталар, ўқ-дорилар ва Украина ғарбдан қабул қилиб олган авиация воситалари сақланаётган омборлар бўйлаб зарбалар берилган.
«Зарбалар нишонга бориб етди. Барча объектларга аниқ зарба берилди», — дейилган РФ мудофаа вазирлиги хабарида.
