Шартнома асосида хизмат қилаётган чет элликларга Россия фуқаролигини олишга рухсат берилади

Россия президентининг фармонига кўра, Украинада Россия Федерацияси учун уришаётган чет эл фуқаролари Россия фуқаролигини олиш учун ариза топшириши мумкин.

Фото: РИА Новости

Россиянинг Украинага ҳужуми пайтида армияда ёки «ҳарбий тузилмаларда» ҳарбий хизматни ўташ учун Россия Қуролли кучлари (РФ ҚК) билан шартнома тузган чет элликлар Россия фуқаролигини олиш учун ариза бериши мумкин. Россия президенти Владимир Путин томонидан имзоланган тегишли фармон 4 январ, пайшанба куни норматив-ҳуқуқий ҳужжатлар порталида эълон қилинди. Уруш иштирокчиларининг яқин қариндошлари ҳам Россия фуқаролигини олади.

Бундан ташқари, уруш пайтида Россия Қуролли кучларидан соғлиғи сабабли истеъфога чиққан, шартнома муддати тугаган, ҳарбий хизматни ўташ ёшига етган хорижликлар Россия фуқаролигини олиш учун ариза бериши мумкин. Путиннинг фармонига кўра, 2014 йил 18 мартгача Қрим ёки Севастополда доимий яшаган Украинада туғилган фуқаролар ҳам Россия фуқаролигини олиш учун ариза бериш ҳуқуқига эга.

2023 йил май ойида Путин Россия Қуролли кучларида ҳарбий хизматни ўташ учун шартнома тузган хорижликларга соддалаштирилган тартибда Россия фуқаролигини беришга рухсат берувчи фармонни имзолаган эди. Россия Федерацияси Тергов қўмитаси раҳбари Бастрикин аввалроқ Россия паспортини олган мигрантлар Украинага қарши урушда қатнашишдан бош тортса, уларни фуқароликдан маҳрум қилишни таклиф этганди.

Путиннинг 2023 йилдаги фармонлари ярми махфий бўлди

«Медиазона» маълумотларига кўра, 2023 йилда Путин имзолаган фармонларнинг тахминан ярми махфий бўлган. Президент фармонлари кетма-кет рақамланади, «ҳисоблагич» эса ҳар йил бошида ноллаштирилади, дея таъкидлади нашр норматив-ҳуқуқий ҳужжатлар расмий сайти маълумотларига таяниб. Шу тариқа, ўтказиб юборилган рақамларни санаб, қанча фармон махфий эканлигини тушуниш мумкин, деб ёзади «Медиазона».

2022 йилда Украинага ҳужум фонида бундай махфий фармонларнинг улуши 45 фоизгача ошган. 2023 йилда у рекорд даражадаги 49,5 фоизга етди. Махфий фармонлар, жумладан, ҳарбий хизматчиларни мукофотлаш ва урушга жалб қилинган маҳкумларни афв этиш учун ишлатилади.

Шу билан бирга, урушнинг иккинчи йилида Путин томонидан имзоланган фармонлар умумий сони деярли ўзгаришсиз қолди. 2022 йилда - 996 та, 2023 йилда - 997 та фармон имзоланган. Путин махфий фармонлар бўйича аввалги рекордни 2001 йилда, Иккинчи чечен уруши авжида ўрнатган эди: ўшанда бу кўрсаткич 47 фоизни ташкил этган, деб ҳисоблайди «Медиазона».