Тадбиркорларга экологик ҳуқуқбузарликларни ҳам фото ва видеога қайд этиш ҳуқуқи берилмоқда

Бунда тадбиркор жарима сифатида ундирилган маблағнинг 20 фоизи миқдорида пул билан рағбатлантирилади.

Фото: Kun.uz

Эндиликда автомобил йўлларида фото ва видео қайд этиш воситаларини ўрнатган тадбиркорлар экологик ҳуқуқбузарликларни ҳам қайд этиши ва Давлат экологик назорат инспекциясига хабар бериш мумкин. Бу ҳақда Huquqiy axborot канали маълум қилди.

Таъкидланишича, бу тартиб “Чиқиндиларни бошқариш тизимини такомиллаштириш ва уларнинг экологик вазиятга салбий таъсирини камайтириш бўйича чора-тадбирлар тўғрисида”ги президент фармонида қайд этиб ўтилган. Фармон билан автомобил йўлларида радар ўрнатган тадбиркорларга экологик ҳуқуқбузарликларни қайд этиш ва Давлат экологик назорат инспекциясига хабар бериш ҳуқуқи ҳам берилмоқда. Бунда тадбиркор жарима сифатида ундирилган маблағнинг 20 фоизи миқдорида пул билан рағбатлантирилади.

Шунингдек, ҳар йили энг узоқ (камида 10 йил) ва садоқатли хизмат кўрсатган санитар тозалаш корхоналари ходимлари учун “Табиат уйғунлиги ҳимоячиси” танлови ўтказилади. Мазкур ходимлардан 100 нафарининг давлат ОТМга тўлов-контракт асосида ўқишга кирган фарзандлари ёки невараларига контрактининг тўлиқ суммаси тўлаб берилади.

Бундан ташқари, ҳар йили “Энг тоза маҳалла” танлови ўтказилиб, танловда ғолиб бўлган 14 та маҳаллага чиқинди йиғиш майдончаси қуриш, чиқинди контейнерларини ўрнатиш ва дарахт экиш учун жами 500 млн сўм пул ҳамда хизматда фойдаланиш учун 1 тадан электромобил берилиши ҳам кўзда тутилган.

Фармонга кўра, 2024 йил 1 апрелдан:

— кўчмас мулк ҳамда автотранспортлар билан боғлиқ битимларни нотариал тасдиқлашда қарздорлик мавжудлиги Ягона электрон тизим орқали онлайн текширилиб, қарздорлик бартараф этилгач нотариал ҳаракат амалга оширилади;

— барча санитар тозалаш корхоналари Ягона электрон тизим орқали хизмат кўрсатади, тизимга уланмаган корхоналар билан шартнома бекор қилинади ва улар хизмат кўрсатадиган ҳудудлар давлат-хусусий шериклик асосида бошқа корхонага берилади.

Олдинроқ мазкур фармон билан чиқинди олиб чиқиб кетиш бўйича қарзи борларга электр учун тўлов қилиш чеклаб қўйилиши хабар қилинганди.