Латвия пойтахти Рига шаҳрида Wolt етказиб бериш хизматининг ўзбекистонлик ходими Ҳасан Азларов бирданига машҳур бўлиб кетди. Бунга унинг пианино чалиши сабаб бўлган.
Ҳасан Азларов буюртмани кутиш вақтида ресторанларда пианино чалиб турган. Унинг навбатдаги ижросини ресторанда овқатланиб ўтирган мижозлардан бири видеога олиб, интернетга жойлаган ва йигит ижтимоий тармоқларда машҳур бўлиб кетган.
Шундан сўнг Латвия оммавий ахборот воситалари Ҳасанга эътибор қаратиб, ресторанларда мусиқа чаладиган тошкентлик курер ҳақда ёза бошлаган. Бир неча кун олдин у ҳақда Латвия телевидениесининг «Бугун тунда» дастурида репортаж намойиш этилди.
Репортажда Ҳасан эгизаги Ҳусан билан пойтахтдаги машҳур Глиэр номидаги махсус мусиқа мактабида таҳсил олгани, ресторанларда мусиқалардан узоқлашиб кетмаслик учун пианино чалиб туриши ҳақида гапирган.
Маълум бўлишича, Ҳасан Тошкентдаги Театр институтининг телевидение ва кино режиссёрлиги факултетини тамомлаган. 2021 йилда у Латвия Ахборот тизимлари менежменти университети (ISMA)нинг магистратура босқичига ўқишга кирган.
Дарсдан бўш вақтларида аввал новвой бўлиб, кейинчалик эса етказиб бериш хизматида ишлаган. Ҳасаннинг айтишича, эгизи Ҳусан Тошкент консерваториясини тамомлагач АҚШга кетган, ҳозир шу давлатда яшайди.
Ҳасан 2023 йил баҳорида ўқишни битириб, Тошкентга қайтган ва ёзнинг охирида ишлаш учун Латвияга қайтган. Бироқ унга иш таклиф қилган компания энди ишга ололмаслигини маълум қилган. Шундан сўнг у етказиб бериш компаниясида ишлай бошлаган.
Ҳасан ижтимоий тармоқларда машҳур бўлгач унга Ригадаги ресторанлардан бирида пианиночи бўлиб ишлаш таклифи тушган. У ўзи севган иш билан шуғулланиши, халқ олдида чиқиш қилишидан хурсанд.
