Яқин-яқинларгача хорижда бирор бизнес бошлаган ватандошимиз ҳақида эшитсак, ноёб бир ҳодисани эшитгандек, қизиқиб, жойи келса ажабланиб қолардик. Ўзбекистон дунёга очилгани сари чет элларга чиқадиган сайёҳ ҳам, ажнабий мамлакатларда муқим қолиб, бирор иш юритишни бошлаб юборган ватандошлар ҳам кўпайяпти.
Саудия Арабистони деганда илк дафъа кўз олдимизга муқаддас шаҳарлар Макка ва Мадина, ҳаж ва умра учун борган миллионлаб мусулмонлар келади. Ватандошларимизнинг ҳаж ва умра зиёратларига боришлари сўнгги йилларда каррасига кўпайди. Табиийки, улар учун ўша шаҳарлардаги сервис, хизмат кўрсатиш, таомланиш каби кундалик юмушлар ҳам муҳим аҳамият касб эта бошлади.
Ўзбекистонликларнинг Ватандан узоқда ҳам ўз уйидагидек таомланиши, шунингдек, хориждан келган сайёҳлар учун ўзбек таомлари ва меҳмондўстлигини танитиш учун муқаддас Ҳарам ҳудудида илк ўзбек ресторани – Mahmood Kebab'ни очган Нодир Маҳмуд билан учрашдик. Илк ўзбек ресторани дейишимиз асосга эга: ватандошимиз айнан Ҳарам ҳудудида 100 фоиз ўзбек инвестицияси билан очилган илк ўзбек таомлари ресторани эканига урғу берди.
“АҚШда очмоқчи эдик, ризқимиз Мадинада экан”
— Ресторан бизнеси соҳасига кириб келишимнинг тарихи болаликка бориб тақалади. Кўпчилик ота-оналар қатори бизнинг ҳам отамиз “болам бекор юрмасин, бирор ҳунарни ўргансин” деган мақсадда уйимиз яқинида умумий овқатланиш шохобчасига – ошпазга шогирдликка берди. Аста-секин шу йўлда юриб, бу ҳунарнинг сир-асрорларини ўрганиб, катта бўлдик. Ризқимиз шу соҳадан экан, шунда барака топдик.
Ёшликдан дунёга чиқишни ният қилганмиз. Дунё таниган катта брендларга ҳавас қилиб, шунақа брендни яратиб, ўзимиз ҳам ресторанлар тармоғини кўплаб хорижий шаҳарларда очсам, деб ният қилардим.
Илк савдо нуқтамизни АҚШда очмоқчи бўлдик. У ерга бориб, паст-баландини ўрганишимиз жараёнида бизга яқин танишимиз Мадина вариантини айтиб қолди. Келдик. Кўрдик. Ўргандик. Ва ризқимиз қўшилган экан, шу ерда ресторан очдик. Ҳа, бу катта таваккал эди. Лекин бизнесда таваккал қилмаса бўлмайди.
“Саудияда бизнес юритишда асосийси сабр керак...”
— Аллоҳга шукур, ҳозирча ҳаммаси яхши кетяпти. Ишни бошлаш осон бўлмаган. Ҳужжатбозликлар, юридик ташвишлар, югур-югурлар анча вақтни олди.
Мадина пойтахт бўлмагани, сокинроқ, асосан ибодат ва зиёрат учун келувчилар шаҳри бўлгани сабаб, бу ерда ишлар секинроқ битади. Ҳужжатлаштириш ишлари 6-7 ой вақт олди. Ҳар бир бизнесда қийинчилик бўлади, лекин уни енгиб ўта олмаган бизнесмен – бизнесмен эмас. Саудияда бизнес бошлашда вақт, билим ва энг асосийси, сабр керак.
“Ресторанимиз доим гавжум”
— Ресторанимизга дунёнинг турли мамлакатларидан минглаб хўрандалар киришади. Улар таомларимиз ва меҳмондўстлигимиздан таъсирланиб, бошқаларга ҳам тавсия қилишади. Доим гавжум.
Гоҳида айрим хорижликлар таомланиш асносидаёқ Ўзбекистон ҳақида интернетдан ўрганиб, шу ернинг ўзида ўтириб, интернетдан юртимизга чипта олган пайтлари бўлган. Шуларни кўриб илҳомланамиз, ғурур туямиз ва куч-ғайрат оламиз.
Мақсадимиз – муқаддас шаҳарга келган ҳожиларга, зиёратчиларга хизмат қилиш, уларнинг ҳожатини чиқариш. Қолаверса, Ўзбекистон номини ўз йўналишимиз орқали дунёга янада кенгроқ ёйиш, юртимизни танитиш.
