ОАВнинг рўйхатга олиш ҳақидаги аризасини кўриб чиқиш муддати қисқармоқда

Қонун билан 20 та қонунга ўзгартириш ва қўшимчалар киритилмоқда, улар фуқаролар ва давлатнинг турли фаолиятига оид.

Қуйидаги ҳолатларда давлат органлари ва бошқа ташкилотлар томонидан мурожаатларни кўриб чиқилиши ҳамда давлат рўйхатидан ўтказиш учун тўланадиган давлат божи, йиғим ва бошқа тўловларни амалга оширганлик ҳақида тўлов ҳужжатларини тақдим этилиши ҳақидаги талаб бекор қилинмоқда:

• банклар, кредит бюроларини ташкил этишда;
• партия, ННТларни рўйхатдан ўтказишда;
• адвокатлик мақомини олишда;
• ҳакамлик судларига мурожаат этишда;
• махсус иқтисодий зона иштирокчилари реестрига киритишда.

Жамғариб бориладиган пенсия тизимида 16 ёшга тўлган фуқароларни ҳисобга қўйиш уларга идентификацияловчи ID-карталарни бериш билан бир вақтда амалга оширилади.

Жамғариб бориладиган пенсия тизимида 2021 йил 1 июнга қадар ҳисобга қўйилмаган фуқароларни ҳисобга қўйиш уларнинг яшаш жойидаги Халқ банки филиали томонидан ЖШШИРдан фойдаланилган ҳолда амалга оширилади.

Рўйхатга олувчи орган томонидан ОАВни рўйхатга олиш ҳақидаги аризасини кўриб чиқиш муддати қисқармоқда (15 дан 10 кунгача).

Адвокатга гувоҳнома бериш муддати қисқармоқда (2 иш куни ичида). Адвокатлик тузилмаларини рўйхатдан ўтказиш давлат хизматлари марказлари томонидан амалга оширилади. Шунингдек, уларни рўйхатдан ўтказганлик учун давлат божи миқдори камаймоқда (БҲМнинг 1 баравари).

Нодавлат архив фаолиятини амалга оширишни бошлаш учун “Ўзархив” агентлигини хабардор этиш кифоя қилади.