Ипакчилик қўмитасининг айрим вазифа ва функциялари бошқа ташкилотларга ўтказилади

Пиллани етиштириш ва ипакчилик соҳасини янги босқичга олиб чиқишнинг устувор йўналишлари этиб қуйидагилар белгиланади:

• пиллачилик ва ипакчилик соҳаларида бозор муносабатлари ва ҳалол рақобатни ривожлантириш учун шарт-шароитлар яратиш, шу жумладан, тадбиркорликни бошлаши ва фаолиятини юритишида шаффоф қоидаларини қўллаш орқали мавжуд маъмурий тўсиқларни бартараф этган ҳолда ишлаб чиқариш занжирининг барча иштирокчилари учун тенг имкониятлар ва имтиёзлар тизимини йўлга қўйиш;
• пиллани етиштириш ва ипакчилик соҳасида мавжуд маъмурий тўсиқларни бартараф этган ҳолда эркин бизнес муҳитини ҳамда тадбиркорларнинг тармоққа кириши ва фаолият юритиши учун ошкора қоидаларни қўллаш орқали тенг имкониятлар ва ишлаб чиқариш занжири барча иштирокчилари учун манфаатли тизим яратиш;
• мамлакат ичкарисида очиқ пилла бозорини ташкил этиш, пиллани бозор нархларида сотилишини ташкил этиш орқали фермерлар, якка тартибдаги тадбиркорлар ва ўзини ўзи банд қилган шахсларни пилла етиштиришга жалб этиш;
• ипак қуртининг маҳаллий зотларини яратишни рағбатлантириш, пилла етиштирувчиларни кафолатли равишда сифатли ипак қурти билан таъминлаш ҳамда ипак қурти ишлаб чиқарувчи ва етказиб берувчилар масъулиятини ошириш;
• сифатли ипак ишлаб чиқариш, уни қайта ишлаш даражасини ошириш ва қўшилган қийматли тайёр маҳсулот ишлаб чиқариш учун қулай шароитлар яратиш;
• пилла етиштириш ва ипакни қайта ишлаш жараёнларига илмий-тадқиқот ва тажриба-конструкторлик ишланмаларини кенг жорий қилиш.

Қишлоқ хўжалиги вазирлиги ҳузуридаги Ипакчилик ва жун саноатини ривожлантириш қўмитаси Қишлоқ хўжалиги вазирлиги ҳузуридаги Ипакчилик саноатини ривожлантириш қўмитаси этиб қайта номланади.

Қўмитанинг қуйидаги вазифа ва функциялари, яъни: 
 
а) яйловларни ривожлантириш, шу жумладан уларнинг қатъий ҳисобини юритиш, яйловлардан самарали фойдаланиш ва уларни муҳофаза қилиш – Қишлоқ хўжалиги вазирлигига;
б) қоракўлчиликни ривожлантириш, мол бош сонини кўпайтириш, қоракўл зотли қўйларнинг юқори даражада маҳсулдор наслларини жорий қилиш – Ветеринария ва чорвачиликни ривожлантириш қўмитасига;
в) қоракўлчилик соҳасининг тери ва жун саноати йўналиши бўйича давлат бошқарувига оид вазифалар – Инвестициялар, саноат ва савдо вазирлигига ўтказилади.

Қоракўлчилик ва чўл экологияси илмий-тадқиқот институти ҳамда Бухоро чўл-яйлов озуқабоп ўсимликлар уруғчилиги илмий-ишлаб чиқариш маркази қўмитанинг ихтиёридан Ветеринария ва чорвачиликни ривожлантириш қўмитасига ўтказилади.

Қўмитанинг “Ўзбекипаксаноат” уюшмасига юклатилган нодавлат нотижорат ташкилотларга хос бўлмаган вазифа ва функцияларини бекор қилиш ҳамда уларни қўмитага ўтказиш тўғрисидаги таклифи маъқулланади.

Шундай тартиб ўрнатиладики, унга мувофиқ:

а) 2025 йил пилла етиштириш мавсумидан бошлаб:
пиллачилик кластерларига ҳудудларни бириктириш ва ушбу ҳудудда етиштирилган пиллани уларга мажбурий сотиш амалиёти бекор қилинади;
касаначилар ва фермерлар томонидан етиштирилган пилла маҳсулотлари эркин тарзда, шу жумладан биржа орқали сотилади;
ипак қурти уруғини импорт қилишда қўмита пилла етиштирувчиларга, шу жумладан фермерларга кўмаклашади ва барча импорт қилувчилар учун тенг шароитлар яратилади;
б) 2024 йилда пилла етиштирувчи жисмоний шахсларга ҳар йили етиштириладиган пилла (ҳўл пилла) ҳосилининг бир килограмми учун республика бюджети ҳисобидан 10 минг сўм миқдорида субсидия ажратилади.

Қуйидагиларни назарда тутувчи пилла етиштириш ва ипакчилик соҳасини 2030 йилгача ривожлантиришнинг асосий мақсадли кўрсаткичлари тасдиқланади:

• республиканинг ипак қурти уруғига бўлган эҳтиёжни қондириш даражасини амалдаги 50 фоиздан 80 фоизга чиқариш;
• республикада ишлаб чиқариладиган “GBT 1797-2008” Хитой стандарти бўйича хом ипак сифатини 2А классдан 6А классга ошириш ҳамда уни қайта ишлаш даражасини 25 фоиздан камида 75 фоизга чиқариш.