Бангладешда кўп қаватли уйда ёнғин: ўнлаб кишилар ҳалок бўлган

Бангладеш пойтахти Дакка шаҳридаги кўп қаватли бинода чиққан ёнғин оқибатида камида 43 киши ҳалок бўлди.

Фото: AFP

Маҳаллий нашрларга кўра, ёнғин маҳаллий вақт билан 29 феврал куни кечқурун соат 10 атрофида етти қаватлик бинони эгаллаган ресторанда чиққан ва олов тезда барча қаватларга тарқалиб, ўнлаб кишилар оловли қопқонда қолган.

Ўт ўчирувчиларнинг айтшиича, ёнғин аллақачон ўчирилган, аммо ёнғин келиб чиқиш сабаби ҳозирча номаълум.

Мамлакат соғлиқни сақлаш вазири Саманта Лал Сенга кўра, қурбонлар орасида аёллар ва болалар ҳам бор, яна ўнлаб жабрланганлар шифохоналарнинг куйиш бўлимига ётқизилган.

«Биз зинапоядан кўтарилаётган тутунни кўрганимизда олтинчи қаватда эдик, — деган ресторан менежерларидан бири бўлган ва ёнғиндан омон чиққан Сохел журналистларга. — Кўпчилик зинапоялар бўйлаб юқорига кўтарилди, биз эса сув қувури бўйлаб пастга тушдик. Айримлар юқори қаватлардан сакраб жароҳатланди».