Украинада урушнинг 742-куни ўтди. Асосий маълумотлар:

  • РФ қўшини Украина президенти Володимир Зеленский ва Греция бош вазири Кириакос Мицотакис ташрифи вақтида Одессага ракета зарбаси йўллади. Беш киши ҳалок бўлган, яна беш киши яраланган.
  • Буюк Британия Киевга Россия Маркази банки активларини беришга тайёр. Россия агар репарация тўласа, уларни қайтариб олиши мумкин.
  • Аннексия қилинган Бердянскда сайлов комиссияси аъзосининг автомобили портлатилди. Тергов қўмитаси теракт ҳақида жиноий иш очган.
  • RusNews журналисти Роман Иванов армия тўғрисидаги «фейк» тўғрисидаги модда бўйича айбланиб, етти йилга озодликдан маҳрум этилди.
  • Россия қўшини Украинага дронлар билан ҳужум қилди. Украина қуролли кучлари 42 та учувчисиз учиш аппаратларидан 38 таси уриб туширилганини маълум қилди.
  • Курск областида дронлар Михайловск кон-бойитиш комбинатига зарба берди. Корхона ҳудудидаги ёнилғи сақлаш омбори ёниб кетган.
  • Белгород ва Воронеж областлари губернаторлари ҳам дронлар ҳужуми тўғрисида хабар берган.
  • Москвада суд «КраСава» блоги муаллифи Евгений Савинни армияни «обрўсизлантириш» тўғрисидаги иш бўйича ҳибсга олди.
  • Германия мудофаа вазирлиги немис офицерларининг Taurus ракеталари ҳақидаги суҳбати Россия махсус хизматлари томонидан ёзиб олинишига бир кишининг хатоси сабаб бўлганини маълум қилди.
  • Венгрия президенти Швециянинг НАТОга киришини маъқуллаш тўғрисидаги қонунни имзолади.

Оккупация остидаги Луҳанск области ҳаёти

Украинанинг Луҳанск областининг Россия томонидан аннексия қилинган қисмида 6 март куни Кировск шаҳрига кетаётган автобус минага тушиб портлаб кетди. «ЛХР» раҳбари Леонид Пасечник хабар беришича, автобусда саккиз киши бўлган. Беш киши, жумладан Кировск коммунал хизматлар комбинатининг тўрт нафар ходими ҳалок бўлган, яна уч киши жароҳатланган.
Россия назорати остидаги Кировск шаҳар округи / Спутник / imago images / Scanpix / LETA
«ЛНР»да Украинанинг Россия томонидан эгаллаб олинган бошқа ҳудудлари қатори 2022 йил октябридан буён ҳарбий ҳолат режими амал қилмоқда. Шунга қарамай, РФ ҳукумати бу ерда ҳам 15-17 март кунлари РФ президентлиги сайловларини ўтказмоқчи.