Британияда Руандага депортация қилиш учун дастлабки мигрантлар қўлга олинди

Британия ҳукумати ноқонуний равишда келган муҳожирларни уларнинг бошпана сўровларини ҳисобга олмасдан Руандага депортация қилмоқчи. Йил охиригача Шарқий Африка давлатига 5700 нафар ноқонуний муҳожирни депортация қилиш режалаштирилган.

Фото: Getty Images

Британияда Руандага олиб кетилиши лозим бўлган биринчи ноқонуний муҳожирлар қўлга олингани ҳақида 1 май, чоршанба куни Лондондаги Ички ишлар вазирлиги маълум қилди. Идора ушбу ҳаракатни режадаги «яна бир муҳим босқич» деб атади, унга кўра мамлакатга ноқонуний йўллар билан кирган муҳожирлар бундан буён Руандага чиқариб юборилади.

Британия Ички ишлар вазирлиги баёнотида айтилишича, мамлакат бўйлаб ноқонуний муҳожирларни қўлга олиш учун рейдлар ўтказилмоқда. Вазирлик қўллари кишанланган одамларни машиналарга ўтқазилаётгани акс этган суратлар ва видеоларни эълон қилди. Ички ишлар вазири Жеймс Клеверли унинг департаменти «Руандага парвозлар бошланиши учун бу ерда бўлишга ҳаққи йўқларни тезда қўлга олиш» устида иш олиб бораётганини айтди.

Бошпана сўровларини кўриб чиқмасдан чиқариб юбориш

Британия бундан буён Руандага ноқонуний равишда келган барча муҳожирларни, келиб чиқиш мамлакатидан қатъи назар, уларнинг бошпана сўровларини кўриб чиқмасдан чиқариб юборишни режалаштирмоқда. Шу мақсадда Руанда хавфсиз учинчи давлат деб эълон қилинди. Умуман олганда, Британия расмийлари йил охиригача Руандага 5700 нафар ноқонуний муҳожирни депортация қилишни режалаштирмоқда.

Янги моделга кўра, бошпана сўраш даъволари бундан буён Руанда ҳукумати томонидан Кигали шаҳрида кўриб чиқилади. Агар ариза маъқулланса, мигрант Руандада яшаш ҳуқуқига эга бўлади ва Британияга қайтиб кела олмайди. Британия ҳукумати депортацияни июлгача бошлашни режалаштирмоқда.

Янги моделнинг тўхтатувчи таъсири

Лондон янги қоидалар Британияга ноқонуний киришни хоҳловчи муҳожирларга нисбатан тўхтатувчи таъсир кўрсатишига умид қилмоқда. Расмий статистик маълумотларга кўра, 2022 йил январидан 2023 йилнинг июнигача 57 мингдан ортиқ киши кичик қайиқларда Ла-Манш орқали Британияга ўтган. Жорий йилнинг дастлабки тўрт ойида Британияга ушбу усул ёрдамида 7200 дан ортиқ киши кириб келди.

29 апрел куни Британияда рад этилган биринчи қочқин мамлакатдан Руанда томон чиқариб юборилди.

Инсон ҳуқуқлари ташкилотлари ва БМТ Британия расмийларининг муҳожирларни Руандага чиқариб юбориш бўйича ҳаракатларини халқаро ҳуқуқ бузилиши деб ҳисоблайди.