NASA Starliner бошқариладиган космик кемасининг биринчи парвозини кейинга қолдирди

АҚШ Миллий аэронавтика ва космик тадқиқотлар бошқармаси (NASA) стартдан икки соат олдин Boeing компаниясининг Starliner бошқариладиган космик кемаси Халқаро космик станция (ХКС)га биринчи синов парвозини бекор қилди. Дунё ОАВ 7 май, сешанба куни эрта тонгда хабар беришича, бунга Starliner’ни орбитага чиқариши керак бўлган United Launch Alliance (ULA) ишлаб чиқарган Atlas-V ракета-ташувчисининг кислород чиқариш клапанидаги муаммо сабаб бўлган. 

Бошқариладиган Starliner космик кемасининг учирилиши 6 май куни маҳаллий вақт билан соат 22:34 да Канаверал бурни коинот марказидан амалга оширилиши керак эди. NASA астронавтлари Барри «Бутч» Уилмор ва Сунита Уилямс Ерга қайтишдан олдин ХКСда тахминан бир ҳафта бўлиши кутилганди. 

NASA раҳбари Билл Нелсон X ижтимоий тармоғида парвознинг бекор қилинишини изоҳлар экан, унинг асосий устуворлиги астронавтлар хавфсизлиги ҳисобланишини айтиб ўтди. «Биз тайёр бўлганимизда учирамиз», дея қўшимча қилди у аниқ санани кўрсатмасдан. «Ракетани қарзга олиш керак бўлса, бизга хабар беринг», - деб изоҳ берди бунга SpaceX асосчиси Илон Маск. 

Boeing SpaceX билан биргаликда NASA тижорат экипажи дастури - Commercial Crew Program’да иштирок этади, унинг мақсади астронавтларни коинотга етказишдир. Boeing NASA шартномаси бўйича экипаж капсуласини ишлаб чиқиш учун 5 миллиард доллардан кўпроқ, SpaceX эса 3,1 миллиард доллар маблағ олди. SpaceX аллақачон Crew Dragon кемаларида астронавтларни ташиш бўйича бир нечта миссияларни бажарган. 

Германиянинг Der Spiegel ҳафталик нашри эслатганидек, бортида астронавтлар бўлган Starliner космик кемаси учирилиши қолдирилаётгани биринчи ҳолат эмас: «Бошқалар қаторида Boeing капсуланинг парашютлари ва симларидаги нуқсонларни бартараф этиши керак».