Хорижий террорчи жангчиларнинг халқаро тинчликка таҳдидига жавобан, Бирлашган Миллатлар Ташкилоти Хавфсизлик Кенгаши 2014 йил қабул қилган 2178- ва 2017 йил тасдиқлаган 2396-резолюциялар билан аъзо давлатлар, халқаро ҳуқуққа мувофиқ, ватанга қайтган ёки у давлатдан бу давлатга кўчиб ўтган хорижий террорчи жангчилар ва уларнинг оила аъзоларини қонуний судлов йўли билан таъқиб қилиш, уларни реабилитация ва реинтеграция қилиш бўйича аниқ, кенг қамровли махсус ва комплекс стратегияларни ишлаб чиқиш ҳамда амалга оширишга чақирилди.
Ушбу йўналишда, 2018 йилда террористик, экстремистик ёки бошқа тақиқланган ташкилот ва гуруҳлар таркибига адашиб кириб қолган Ўзбекистон фуқароларининг мурожаатларини кўриб чиқиш бўйича Республика идоралараро комиссияси тузилди.
2018 йил 1 ноябрдан террористик, экстремистик ёки бошқа тақиқланган ташкилот ва гуруҳлар таркибига адашиб кириб қолган фуқароларни Комиссия хулосасига асосан жиноий жавобгарликдан озод этиш тартиби жорий этилди.
Вояга етмаганлар ва ёшлар орасида экстремизм ва терроризм ғоялари тарқалишининг олдини олиш, узоқ муддат хорижда бўлган фуқароларни экстремизм ва терроризм ғоялари таъсиридан ҳимоя қилиш, интернет тармоғидан экстремистик ва террорчилик мақсадларида фойдаланишга қарши курашиш 2021–2026 йилларга мўлжалланган экстремизм ва терроризмга қарши курашиш бўйича Ўзбекистон Республикаси Миллий стратегиясининг устувор йўналишлари этиб белгилади.
Мазкур йўналишда норматив-ҳуқуқий ҳужжатларнинг ишлаб чиқилишида Адлия вазирлиги ҳам иштирок этиб, аввало, ҳар қандай вазиятда ҳам Ўзбекистон Республикаси фуқароларининг ҳуқуқ ва манфаатларини ҳимоя қилиш нуқтаи назаридан ёндашилган.
Бу борада жабр кўрган ҳар бир фуқаронинг келгуси ҳаётида ўз ўрнини топиши ҳамда уларга барча шароит ва имкониятларни яратиш мақсадида қонун ҳужжатларига тегишли ўзгартириш ва қўшимчалар киритилган.
2019 йилдан бошлаб “Меҳр” гуманитар операциясининг 5 босқичи ташкил этилиб, улар доирасида мамлакатимизнинг турли ҳудудларидан Сурия, Ироқ, Афғонистон ва бошқа ҳудудларга чиқиб кетиб, жанговар ҳаракатларда иштирок этган 531 нафар аёллар ва болалар Ўзбекистонга қайтарилди.
Репатриация қилинган шахслар қайтиб келгач, биринчи навбатда, аёллар ва болалар реабилитациядан ўтказилди, сўнгра уларнинг оилалари ва жамоаларига тинч (қайта) интеграциялашувига кўмаклашиш бўйича аниқ чоралар кўрилди.
