«Укрэнерго»: Украина энергетика тизимидаги вазият янада қийинлашади

Келгуси ҳафталарда Украина энергетика тизимидаги вазият янада қийинлашади, дея огоҳлантирди «Укрэнерго» миллий энергетика компанияси бошқаруви раҳбари Владимир Кудрицкий 16 июн, якшанба куни «Суспільне» телеканали эфирида. Унга кўра, соат 11:00 дан 23:00 гача узилишлар куннинг қолган қисмига қараганда узоқроқ бўлади ва бу тахминан июл ойининг охиригача давом этади.

«Бу атом электр станцияларининг энергетика блокларини таъмирлаш ўзига хос хусусиятлари билан боғлиқ, шунинг учун бундай график тахминан бир ёки бир ярим ой давомида бўлишига тайёр туриш керак. Ва улар, айниқса кечки вақтда, истеъмолнинг энг юқори соатларида кузатилиши мумкин», деди Кудрицкий.

«Укрэнерго» раҳбари таъкидлаганидек, узилишлар давомийлигига атом электр станцияларини ёзги анъанавий таъмирлаш ишларидан ташқари, бошқа омиллар ҳам таъсир қилади, хусусан, чет элдан электр энергияси импорти ҳажми ва аҳолининг электр энергиясини истеъмол қилишига таъсир этувчи об-ҳаво. 

Россия зарбалари туфайли электрни тежаш режими жорий этилди 

Украинанинг барча ҳудудларида саноат ва уй хўжаликлари учун режали электр таъминотидаги узилишлар Россия Федерациясининг сўнгги ойларда энергетика инфратузилмасига қилган оммавий ҳужумлари фонида жорий этилди. Июн ойи бошида бош вазир Денис Шмихал Россия Украина электр станцияларининг 9 ГВтдан ортиқ қувватини йўқ қилганини айтди. Dpa агентлиги маълумотларига кўра, бу Украина энергетика тизимининг 2014 йилгача бўлган қуввати тахминан 1/6 қисмини ташкил қилади. 

Шу муносабат билан Киев нафақат шикастланган ускуналарни таъмирлашни, балки Украина ҳаво мудофааси ва дронлардан ҳимоя қилишни кучайтириш, энергия тизимини марказсизлаштириш ва электр энергиясини тежашни ўз ичига олган энергетика стратегиясини ишлаб чиқди, Шмихалнинг сўзларига кўра, тежаш «кейинги йилларда украиналиклар кундалик ҳаётининг бир қисмига айланади». Бундан ташқари, Украина ҳукумати Европадан электр энергияси импортини ҳозирги 1,7 гВтдан 2,2 гВтгача кенгайтириш устида ишламоқда. 

Украинанинг ҳамкор давлатлари унга энергия таъминотидаги инқироздан чиқишда ёрдам беришга ҳаракат қилмоқда. Хусусан, АҚШнинг 1,5 миллиард долларлик янги ёрдам пакетининг муҳим қисми, хусусан, Украина энергетика тизимини тиклашга йўналтирилади.