Ўзбекистонда Ёқилғи-энергетика соҳасида инвесторлар кенгаши ташкил этилади, дея маълум қилди Шавкат Мирзиёев энергетика тармоғидаги инвесторлар билан очиқ мулоқотда.
Энергетика лойиҳалари катта сармоя ва мураккаб инфратузилмани талаб қилади. Ер ажратиш, тармоққа уланиш ёки техник шарт олишдаги биргина кечикиш ҳам бутун лойиҳага таъсир қилади. ACWA, Vision Invest, DataVolt, Voltalia ва EDF каби компаниялар бу масалаларни доимий мулоқот орқали ҳал қилишни таклиф этди.
Буни ҳисобга олиб, президент Ёқилғи-энергетика соҳасида инвесторлар кенгашини ташкил этишга қарор қилганини таъкидлади. Кенгашга Президент администрацияси раҳбари Саида Мирзиёева бошчилик қилади.
«Буни инвестор билан президент ўртасидаги масофани қисқартириш учун қиляпман. Юмшоқ қилиб айтяпман, сизлар ҳам буни тушуняпсизлар. Жуда катта муаммомиз, камчиликларимиз, бюрократиямиз, коррупциямиз бор десам, бу ҳам тўғри гап. Шуларнинг барчасининг олдини олиш учун шу чорани қабул қилишга мажбур бўлдим», – деган президент.
Давлат раҳбари кенгашнинг асосий вазифаси – инвесторларни эшитиш бўлиши, кенгаш ер ажратишдан объект ишга тушгунига қадар сармоядорлар дуч келадиган масалаларга тезкор ечим топиш билан шуғулланишини таъкидлаган.
Кенгаш ер ажратишдан объект ишга тушгунига қадар сармоядорлар дуч келадиган масалаларга тезкор ечим топиш билан шуғулланади.
«Биз энергетикага иқтисодиётнинг шунчаки бир тармоғи сифатида қарамаяпмиз. Бу – ўз келажагимиз ва фаровонлигимизнинг мустаҳкам таянчи. Бизга қуруқ сармоя эмас, қалбан боғланган ўзаро ишонч ва чин шериклик керак. Бугунги мулоқотимизнинг бош мазмуни ҳам шунда», – деди президент.
«Ҳар бир янги лойиҳа ҳудудларимиздаги чинакам ўзгариш, одамларимизнинг ўз ҳаёти, ўз иши ва ўз тараққиёти учун мустаҳкам замин дегани. Шу боис, ҳамкорлигимиздаги бош тамойил битта: сизнинг инвестициянгиз мамлакатимиз тараққиётига қанчалик нур олиб кирса, юртимиздаги юксалиш сизнинг ўз муваффақиятингизга шунчалик кенг йўл очади. Чин маънодаги шериклик бу – ўзаро ишонч, ўзаро масъулият ва ўзаро манфаатдир, – деди Шавкат Мирзиёев.
