Ижтимоий тармоқларда ёшлар ўртасида истеъмол қилиш челленжга айлантирилаётган “One Chip Challenge” чипси учун санитария-эпидемиологик хулоса берилмагани маълум бўлди.
![](https://storage.kun.uz/source/10/ppQdhIYzOwlOupL-c5HUcSTvQlDzux33.jpg)
Ижтимоий тармоқларда ёшлар ўртасида “One Chip Challenge” чипсини истеъмол қилиш бўйича челленж бошлангани, бу эса саломатлик билан боғлиқ бир қанча кўнгилсиз ҳолатларга олиб келаётгани тўғрисида маълумотлар тарқалди. Санитария-эпидемиологик осойишталик ва жамоат саломатлиги қўмитаси ҳолатга муносабат билдирди.
“Фуқароларимиздан “Ушбу маҳсулот Ўзбекистонга ҳам олиб келинганми?”, “Маҳсулотга Санэпидқўмита томонидан санитария-эпидемиологик хулоса берилганми?” деган саволлар келиб тушмоқда.
Санэпидқўмита томонидан “One Chip Challenge” маҳсулоти учун санитария-эпидемиологик хулоса берилмаганлигини, шу билан бирга ушбу маҳсулотга хулоса олиш бўйича тадбиркорлар томонидан мурожаат ҳам бўлмаганлигини маълум қиламиз”, дейилади муносабатда.
Санэпидқўмита фуқаролардан хавфсизлиги текширилмаган озиқ-овқат маҳсулотларини харид ва истеъмол қилмасликни сўраган.