Россияда Шереметево аэропортида терактга тайёргарлик кўриш иши бўйича суд ҳукм чиқарилди

Иккинчи Ғарбий округ ҳарбий суди Москванинг Шереметево аэропортида теракт тайёрлаш бўйича иш бўйича айбланувчиларга ҳукм чиқарди: 48 ёшли Михаил Дарий 22 йилга, 28 ёшли Иля Ковилков эса 15 йилга озодликдан маҳрум этилди. Бу ҳақда «Медиазона» мухбири 26 июл, жума куни суд залидан хабар берди. 

Нашрнинг ёзишича, улар жазо муддатининг дастлабки уч йилини қамоқхонада, қолган муддатини эса қаттиқ тартибли колонияда ўтказади. Шунингдек, маҳкумларнинг ҳар бири 600 минг рубл миқдорида жаримага тортилди. Бундан ташқари, Дарийга жазо муддатини ўтаб бўлгач, икки йил давомида интернет саҳифаларини бошқариш тақиқланган. 

Михаил Дарий ва Иля Ковилков бир гуруҳ шахслар томонидан олдиндан тил бириктириб теракт содир этишга уринишда ва уюшган гуруҳ томонидан портловчи моддалар ишлаб чиқаришда айбланган. Дарийга қўшимча равишда террорчилик ташкилоти фаолиятида қатнашиш ва террорчилик фаолиятига оммавий чақириқ айбловлари қўйилди, деб ёзади «Медиазона». 

Прокуратура айбланувчиларни ёнилғи бакларини портлатишга уринганликда айблади

Россия прокуратурасининг айбловига кўра, иш бўйича айбланувчилар Шереметеводаги ёнилғи қуйиш шохобчасида ёнилғи бакларини портлатиб юборишга уринган, шунингдек, Telegram’да «россиялик ёшлар орасида терроризмни тарғиб қилган». Айблов тарафидан гувоҳ сифатида кўрсатма берган аэропорт ходими Игор Сорокин сўзларига кўра, айбланувчиларнинг мақсади ҳар бири сиғими 30 минг тонна бўлган олтита резервуар бўлган. Аэропортнинг Е терминали резервуарлардан 300 метр узоқликда жойлашган, дея хабар беради SotaVision Сорокиннинг сўзларига таяниб.

Ҳар икки судланувчи ҳам айбини тан олди. Михаил Дарий судда унинг қариндошлари Украинада яшашини ва уруш бошиданоқ уни қўллаб-қувватламаганини айтди. «Мен умумий вазиятни тушунмадим, кўзим олдида фақат болалар, оилалар юзлари турарди, бу ҳис-туйғулар ва ўйлар махсус ҳарбий операцияга (Россия Федерациясининг Украинага қарши қуролли ҳужуми) қарши фаолроқ курашишга ундади», - дея Дарий сўзларини келтирган SOTAvision. 

Дарийнинг сўзларига кўра, чатларнинг бирида у «Озод Россия» легиони куратори билан танишган, у Молдовага чипта олиб берган, шунингдек, Шереметево аэропортида ўт қўйилиши учун пул тўлаши керак эди. Судда Дарий Украина ва Россия ўртасида тинч музокараларга эришмоқчи бўлганини тушунтирди, деб ёзади «Медиазона». Иля Ковилков судда гувоҳлик беришдан бош тортди, лекин «Украина тарафдори эмасман, одамларга ачинаман», деди. Иля Ковилков эҳтиёт чорасини танлаш бўйича биринчи йиғилишга калтакланиш излари билан олиб келинган, дея аниқлик киритмоқда нашр.