Украина президенти Володимир Зеленский АҚШ ҳақида гапирганида эҳтиёткорроқ бўлиши лозим, деди Америка молия вазири Скотт Бессент.
У Украина раҳбарининг Америка разведка маълумотлари беришни тўхтатиб қўйгани ҳамда Starlink ва Starshield тезлиги Оқ уй буйруғи билан чеклангани тўғрисидаги сўзларига ана шундай изоҳ берди.
«Зеленский ҳақиқатга тўғри келмайдиган бундай баёнотлар беришда жуда эҳтиёткор бўлиши лозим», — деди Бессент NBC News эфирида.
У шунингдек, АҚШ Украинани ўз иттифоқчиси деб ҳисоблаши тўғрисидаги саволга жавоб беришдан ўзини олиб қочди.
Бессент ўзининг АҚШ президенти ёки давлат котиби эмаслигини айтаркан, АҚШ Москвани эмас, Киевни таъминлаётганини таъкидлади.
«Айнан мана шу нарса иттифоқчилик муносабати бўлади», — дея қўшимча қилди у.
Аввалроқ Володимир Зеленский Space Х компанияси Оқ уй буйруғи билан сунъий йўлдош интернети тезлигини чеклаганини ҳамда АҚШ Украинага Россия зарбалари ҳақида разведка маълумотларини бермаганини айтганди.
Ўз навбатида, АҚШ давлат котиби Марко Рубио Оқ уй Space Х компаниясининг сунъий йўлдош интернетини Украина ҳарбийлари учун чеклаш тўғрисида фармойиш бермаганини маълум қилди.
Илон Маск эса Украина фойдаланаётган Starshield тизимида тезлик ва фойдаланиш чекловларини SpaceX эмас, АҚШ ҳарбийлари белгилашини айтди.
