Жамоат транспорти учун ҚҚС имтиёзи бекор қилинади

Ўзбекистон президенти 18 сентябр куни айрим солиқ ва божхона имтиёзларини бекро қилишга оид фармон имзолади. Бу ҳақда “Ҳуқуқий ахборот” канали хабар бермоқда.

Фармонга кўра, 2025 йил 1 январдан эътиборан, йўловчиларни ягона тарифлар бўйича ташиш хизматлари учун ҚҚС имтиёзи тугатилади. Ҳозирда бу имтиёз шаҳарда ва шаҳар атрофида ҳаракатланувчи жамоат транспортларига тааллуқли (таксилар ва йўналишли таксилар бундан мустасно).

Бундан ташқари, 1 январдан эътиборан:

• ногиронлиги бўлган шахсларнинг жамоат бирлашмалари ягона иштирокчиси ҳисобланган юридик шахслар томонидан реализация қилинадиган товарлар ва хизматлар учун ҳам ҚҚС имтиёзи бекор қилинади;
• янги барпо этилаётган боғлар, токзорлар ва тутзорлар эгаллаган ерлар учун юридик шахслардан олинадиган ер солиғини тўлашдан озод қилиш тарзидаги имтиёз бекор қилиниб, мазкур ер участкалари бўйича солиқ ставкаси 50 фоизга камайтирилади.

Эслатиб ўтамиз, 1 апрелдан бошлаб дори воситалари, сув таъминоти, иссиқлик таъминоти, канализация ва бошқа айрим товар-хизматлар учун ҚҚС имтиёзи тугатилган, бу ўзгариш уларнинг нархида акс этганди.

Бу йил, шунингдек, заргарлик мақсадида олиб кирилган қимматбаҳо тошлар ҚҚСдан озод этилди.